ମୁମ୍ବାଇ ରେ ବନ୍ଦ ହେଲା ସ୍କୁଲ

ରାଜ୍ୟରେ କରୋନା ହୁ ହୁ ହୋଇ ବୃଦ୍ଧି ପାଉଥିବା ବେଳେ ମହାରାଷ୍ଟ୍ର ସରକାର ପ୍ରଥମରୁ ଅଷ୍ଟମ ଶ୍ରେଣୀ ସ୍କୁଲ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ଗତ କିଛି ଦିନ ହେବ ରାଜ୍ୟରେ କରୋନା ସଂକ୍ରମଣ ମାମଲା ଦ୍ରୁତ ଗତିରେ ବୃଦ୍ଧି ପାଇଛି। ଏହା ବ୍ୟତୀତ ଓମିକ୍ରନ୍ ଭାରିଆଣ୍ଟର ମାମଲା ମଧ୍ୟ ରାଜ୍ୟରେ ବୃଦ୍ଧି ପାଉଛି। ପିଲାମାନଙ୍କର ସ୍ୱାସ୍ଥ୍ୟକୁ ଦୃଷ୍ଟିରେ ରଖି ଉଦ୍ଧବ ଠାକୁର ସରକାର ୩୧ ଜାନୁୟାରୀ ପର୍ୟ୍ୟନ୍ତ ସ୍କୁଲ ବନ୍ଦ କରିବାକୁ ଘୋଷଣା କରିଛନ୍ତି। ତେବେ ଏହି ସମୟରେ ପିଲାମାନଙ୍କର ଅନଲାଇନ୍ ପାଠପଢ଼ା ଜାରି ରହିବ । ମୁମ୍ବାଇ ରେ ଗତ ୨୪ ଘଣ୍ଟାରେ ୧୧,୮୭୭ ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି, ଯାହାକି ଗୋଟିଏ ଦିନ ପୂର୍ବରୁ ୨,୭୦୭ ଅଧିକ । ଏହାଛଡ଼ା ରାଜ୍ୟରେ ଓମିକ୍ରନର ଆଉ ୫୦ଟି ମାମଲା ମଧ୍ୟ ରିପୋର୍ଟ ହୋଇଛି। ରାଜ୍ୟ ସ୍ୱାସ୍ଥ୍ୟ ବିଭାଗ ଏକ ବୁଲେଟିନରେ କହିଛି ଯେ ମହାରାଷ୍ଟ୍ରରେ ଗତ ୨୪ ଘଣ୍ଟାରେ ୯ ଜଣ କରୋନା ରୋଗୀଙ୍କ ମୃତ୍ୟୁ ହୋଇଛି।ଏହା ସହିତ ମୃତ୍ୟୁ ସଂଖ୍ୟା ୧ ଲକ୍ଷ ୪୧ ହଜାର ୫୪୨ ରେ ପହଞ୍ଚିଛି ।