ଭୁବନେଶ୍ବର : ଧୁଡୁଧୁଡିଆ ଦେହ, ପାକଳ କେଶ ଆଉ ପାକୁଆ ପାଟିରେ ଚେନାଏ ହସ । ନିଜ ଜୀବନର ଅପରାହ୍ନରେ ପହଁଚିଥିବା କିଛି ବୁଢ଼ୀ ମାଉସୀ ଓ ତାଙ୍କ ନେତ୍ରୀଙ୍କ ବାବଦରେ କାହାଣୀଟିଏ। ପୁରୁଣା କଥା ସବୁ ମାଉସୀଙ୍କ ଆଖିସାମ୍ନାରେ ଭାସି ଉଠୁଛି । ଜିଲ୍ଲାପାଳ ଥିବା ସମୟରେ ଅଧିକାରୀଙ୍କ ଗହଣରେ ଗାଁକୁ ଆସୁଥିଲେ । ଆଉ ସମସ୍ୟାର ସମାଧାନ ପାଇଁ ନିର୍ଦ୍ଦେଶ ଦେଉଥିଲେ । ବାବୁଆଣୀ ଥିଲେ ବି ସେଦିନର ଭଲପାଇବା ଆଉ ଅକୁଣ୍ଠ ସ୍ନେହ ମାଉସୀର ମନେ ରହିଛି । ଅଭିମାନ କରିଛି ୮୦ ବର୍ଷର ମାଉସୀ। କାହିଁକି ଯାଇଥିଲୁ ଦିଲ୍ଲୀ, ଆମ କଥା କଣ ମନେପଡିନଥିଲା ।
ପୂର୍ବତନ ଆଇଏଏସ ଅଫିସର ଅପରାଜିତା ଷଢଙ୍ଗି ଗାଁକୁ ଗାଁ ବୁଲୁଥିବାବେଳେ ଏବେ ଅନେକ ଚିତ୍ର ସବୁ କଏଦ ହୋଇଛି । ନେତ୍ରୀ ଓ ପ୍ରତିଶ୍ରୁତିର ବିଶ୍ୱାସ ଜନ୍ମାଇବାରେ ବୋଧେ ସଫଳ ହୋଇଛନ୍ତି ଫାୟାରବ୍ରାଣ୍ଡ ଅପରାଜିତା । କାରଣ ଲୋକ ବିଶ୍ୱାସ କରିଛନ୍ତି ବଦଳାଇବେ ପରିସ୍ଥିତି । ସେଥିପାଇଁ ନିଜ ଘରକୁ ଟାଣିଟାଣି ଅପରାଜିତାଙ୍କୁ ବୁଢୀମାଉସୀମାନେ ନେଇଯାଉଛନ୍ତି ।
ଘରର ସମୃଦ୍ଧିରେ କୁଳଲକ୍ଷ୍ମୀଙ୍କର ଏକ ବଡ ଭୂମିକା ଥାଏ ବୋଧେ ରହସ୍ୟକୁ ଠିକ ବୁଝିଛନ୍ତି ଅପରାଜିତା। ବୋହୂମାନଙ୍କୁ ଭେଟିବା ସହ ଶାଶୁ-ବୋହୁଙ୍କ ସିକ୍ରେଟ ସମ୍ପର୍କକୁ ପରଖିଛନ୍ତି । କାରଣ ଆଜି ଯିଏ ଶାଶୁ କାଲି ସିଏ ବୋହୁ ଥିଲେ । ୪୦ ବର୍ଷ ତଳେ ଏମାନେ ବି ଅଳତା ନାଇ ଘରେ ପାଦ ଦେଇଥିଲେ । ଏତିକି ବର୍ଷର ଗ୍ରାମ୍ୟ ଜୀବନର ଅଭିଜ୍ଞତା ବୁଝିବାକୁ ସେ ଚେଷ୍ଟା କରିଛନ୍ତି । କେବଳ ଅପରାଜିତା ନୁହଁ ବରଂ ଯେଉଁମାନଙ୍କୁ ଭେଟୁଛନ୍ତି ସମସ୍ତଙ୍କ ମନରେ ଗୋଟିଏ କଥା । ଗାଁକୁ ଆସିଛି ଘରର ଝିଅ । ଭଲମନ୍ଦଠାରୁ ଅଭିଯୋଗ ସବୁ କିଛି ବଖାଣିଦେଉଛନ୍ତି ।
କେତେକ କୁହନ୍ତି ଏସବୁ ଭୋଟ ଉପରେ କୌଣସି ପ୍ରଭାବ ପକାଇବନି । କିନ୍ତୁ ଯଦି ଘରର ଶାଶୁ-ବୋହୁ ପସନ୍ଦ କରନ୍ତି ପୁରୁଷ ଭୋଟର ବା ଯିବେ କୁଆଡେ । କାରଣ ଏବେ ବି ପ୍ରତିଟି ଘରେ ସ୍ତ୍ରୀ ର ଏକ ସ୍ୱତନ୍ତ୍ର ଦବଦବା ଥାଏ । ଯିଏ ଯେତେ ଚିତ୍କାର କଲେ ବି ଘରେ ସ୍ତ୍ରୀ ର ଦାବି ସ୍ୱତନ୍ତ୍ର ଭୂମିକା ରଖିଥାଏ । ଏଠାରେ ପ୍ରଶ୍ନ ଉଠିପାରେ ନିର୍ବାଚନ ସମୟରେ ତ ନେତା/ନେତ୍ରୀଙ୍କର ଭିନ୍ନ ଚରିତ୍ର ସବୁ ଦେଖିବାକୁ ମିଳେ ଏଥିରେ ଭିନ୍ନତା କଣ ।