ପ୍ରଥମ ବିଜୟ ହାସଲ ଆଶାରେ ନର୍ଥଇଷ୍ଟ ୟୁନାଇଟେଡ଼ ଓ ଓଡିଶା ଏଫସି
ଗୁଆହାଟୀ : ଷଷ୍ଟ ହିରୋ ଇଣ୍ଡିଆନ ସୁପର ଲିଗରେ ନିଜ ନିଜର ପ୍ରଥମ ବିଜୟ ହାସଲ ଆଶା ନେଇ ଶନିବାର ଦିନ ସ୍ଥାନୀୟ ଇନ୍ଦିରା ଗାନ୍ଧୀ ଆଥଲେଟିକ ଷ୍ଟାଡିଅମରେ ପରସ୍ପରକୁ ଭେଟିବେ ନର୍ଥଇଷ୍ଟ ୟୁନାଇଟେଡ଼ ଏଫସି ଏବଂ ଓଡିଶା ଏଫସି ।
ବାହାର ପଡିଆରେ ଗତ ବର୍ଷର ଚାମ୍ପିଅନ ବେଙ୍ଗାଲୁରୁ ଏଫସି ବିପକ୍ଷରେ ଏକ ଗୋଲ ଶୂନ୍ୟ ଡ୍ର ସହିତ ନିଜର ଅଭିଯାନ ଆରମ୍ଭ କରିଥିଲା ହାଇଲାଣ୍ଡର୍ସ ନାମରେ ପରିଚିତ ନର୍ଥଇଷ୍ଟ ୟୁନାଇଟେଡ଼ ଏଫସି । ଅନ୍ୟ ପକ୍ଷରେ ନବାଗତ ଓଡିଶା ଏଫସି ତାର ସର୍ବପ୍ରଥମ ଆଇଏସଏଲ ମ୍ୟାଚରେ ଜାମସେଦପୁର ଏଫସି ନିକଟରୁ ୨-୧ ଗୋଲରେ ପରାସ୍ତ ହୋଇଥିଲା ।
ପ୍ରଥମ ବିଜୟ ହାସଲର ଲକ୍ଷ୍ୟ ପୁରଣ ଲାଗି ନର୍ଥଇଷ୍ଟ ୟୁନାଇଟେଡ଼ ଘରୋଇ ସମର୍ଥନ ଉପରେ ନିର୍ଭର କରିବ । ଶକ୍ତିଶାଳୀ ବେଙ୍ଗାଲୁରୁ ଏଫସି ବିପକ୍ଷରେ ତାଙ୍କ ଦଳ ଲଢୁଆ ଖେଳ ପ୍ରଦର୍ଶନ କରିଥିବାରୁ ମୁଖ୍ୟ ପ୍ରଶିକ୍ଷକ ରବର୍ଟ ଜାର୍ଣ୍ଣି ସମ୍ଭବତଃ ଖୁସି ଥିବେ । ସେଇ ମ୍ୟାଚରେ ଏକ କେନ୍ଦ୍ରୀୟ ପ୍ରତିରକ୍ଷା ଯୋଡି ଭାବେ ମିସ୍ଲାଭ କମୋରସ୍କି ଓ କାଇ ହିଅରିଙ୍ଗସ ବେଶ ଦୃଢ ପରିଲକ୍ଷିତ ହୋଇଥିଲେ । କଲମ୍ବିଆ ମିଡ଼ଫିଲଡର ଜୋସ ଲିୟୁଡୋ ସେମାନଙ୍କୁ ଭଲ ସହାୟତା ଯୋଗାଇବା ସହିତ ମିଡ଼ଫିଲଡରେ ପ୍ରତିପକ୍ଷ ଆକ୍ରମଣକୁ ପ୍ରତିହତ କରିଥିଲେ ।
ବେଙ୍ଗାଲୁରୁ ଏଫସି ଠାରୁ ଗୋଟିଏ ପଏଣ୍ଟ ପାଇବା ନେଇ ମୁଁ ଖୁସି । ଗତ ବର୍ଷର ଚାମ୍ପିଅନ ବିପକ୍ଷରେ ଆମ ଦଳ କଠିନ ପରିଶ୍ରମ କରିଥିଲା । ଏବେ ଆମେ ଘରୋଇ ପଡିଆରେ ଅଧିକ ଆକ୍ରମଣାତ୍ମକ ଫୁଟବଲ ଖେଳିବାକୁ ଚେଷ୍ଟା କରିବୁ,” ବୋଲି କହିଲେ ଜାର୍ଣ୍ଣି ।
ତେବେ କ୍ରୋଏସିଆର ଏହି ପ୍ରଶିକ୍ଷକ ଚାହିଁବେ ଯେ ତାଙ୍କର ଫରୱାର୍ଡ଼ମାନେ ଗୋଲ ସୁଯୋଗ କାର୍ଯ୍ୟକାରୀ କରନ୍ତୁ । ଆକ୍ରମଣାତ୍ମକ ଉରୁଗୁଏ ମିଡ଼ଫିଲଡର ମାର୍ଟିନ ଚାଭେସ ଖୁବ ଶାଣିତ ଜଣାପଡୁଥିବାରୁ ଦଳର ତାରକା ଷ୍ଟ୍ରାଇକର ଆସାମୋଆ ଜ୍ୟାନ ତାଙ୍କଠାରୁ ପୁଣି ଭଲ ସହାୟତା ଆଶା କରିପାରିବେ ।
“ବେଙ୍ଗାଲୁରୁ ବିପକ୍ଷରେ ସ୍କୋର କରିବା ସବୁବେଳେ କଷ୍ଟକର କାର୍ଯ୍ୟ । କିନ୍ତୁ ଜ୍ୟାନ ଭଲ ସୁଯୋଗ ପାଇଥିଲେ । ଏଠାରେ ତାଙ୍କୁ ସମସ୍ତେ ଜାଣନ୍ତି । ସେ ଆମର ଜଣେ ବହୁ ଗୁରୁତ୍ୱପୂର୍ଣ ଖେଳାଳି,” ବୋଲି ମତ ଦେଲେ ଜାର୍ଣ୍ଣି ।
ଅନ୍ୟ ପକ୍ଷରେ ସୁଯୋଗକୁ କାମରେ ଲଗାଇବା ହେବ ଓଡିଶା ଦଳ ପାଇଁ ବଡ କାମ । ପୂର୍ବ ମ୍ୟାଚରେ ଦଶ ଜଣିଆ ଜାମସେଦପୁର ବିପକ୍ଷରେ ପ୍ରତ୍ୟାକ୍ରମଣକୁ ପ୍ରତିହତ କରିବାରେ ସେମାନଙ୍କ ଦୁର୍ବଳତା ଧରା ପଡ଼ିଯାଇଥିଲା । ମ୍ୟାଚ ଶେଷ ଆଡକୁ ସେମାନେ ଗୋଲ ଖାଇବା ଘଟଣା ପ୍ରଶିକ୍ଷକ ଜୋସେପ ଗମ୍ବାଉଙ୍କୁ ନିଶ୍ଚୟ ହତାଶ କରିଥିବ । ତେଣୁ ଜ୍ୟାନ ଓ ଚାଭେସଙ୍କ ଭଳି ଆକ୍ରମଣକାରୀ ଖେଳାଳିଙ୍କ ପ୍ରତି କାର୍ଲସ ଡେଲଗାଡୋଙ୍କ ନେତୃତ୍ୱାଧୀନ ଓଡିଶା ଦଳର ରକ୍ଷଣ ଭାଗକୁ ସତର୍କ ରହିବାକୁ ପଡିବ ।
ଆମର ନିଜସ୍ୱ ଖେଳଶୈଳୀ ରହିଛି । ଆମେ ଆମ ମ୍ୟାଚରେ ବିପକ୍ଷ ଦଳକୁ ବହୁତ ସମ୍ମାନ ଦେଉ । ଜାମସେଦପୁର ମ୍ୟାଚର ଫଳାଫଳକୁ ନେଇ ଆମେ ଆମର ସମସ୍ତ ଖେଳାଳିଙ୍କ ସହିତ ଆଲୋଚନ କରିଛୁ । ଆମକୁ ସୁଯୋଗ ମିଳିଥିଲା, କିନ୍ତୁ ଆମେ କାର୍ଯ୍ୟକାରୀ କରିପାରିଲୁ ନାହିଁ । ତେବେ ଆମେ ଆମର ଖେଳାଳିଙ୍କୁ ନେଇ ସନ୍ତୁଷ୍ଟ,” ବୋଲି କହିଲେ ଗମ୍ବାଉ ।
ଜାମସେଦପୁର ବିପକ୍ଷରେ ଆରିଡେନଙ୍କ ସ୍ମାର୍ଟ ଗୋଲକୁ ଦେଖି ଓଡିଶା ପାଖରେ ଜଣେ ଦକ୍ଷ ସ୍କୋରର ଅଛନ୍ତି ବୋଲି ମନେହୁଏ । ସେହିପରି ଗତ ମ୍ୟାଚରେ ପୂର୍ବତନ ବେଙ୍ଗାଲୁରୁ ଏଫସି ମିଡ଼ଫିଲଡର ଜିସ୍କୋ ହର୍ନାଣ୍ଡେଜ ମଧ୍ୟ ପ୍ରଭାବଶାଳୀ ଖେଳ ପ୍ରଦର୍ଶନ କରିଥିଲେ । ଆସନ୍ତା କାଲି ଏକ ଟାଣୁଆ ଦଳ ବିପକ୍ଷରେ ସେମାନଙ୍କଠାରୁ ସେଇଭଳି ପ୍ରଭାବଶାଳୀ ଖେଳ ଆଶା କରାଯିବ ।