ଅଚଳ ସିସିଟିଭିର ସୁଯୋଗ ନେଇ କୋର୍ଟ ପରିସରରେ ଚୋରଙ୍କ ଉତ୍ପାତ
ଭୁବନେଶ୍ୱର : ଅଚଳ ସିସିଟିଭି ଏବେ ରାଜଧାନୀରେ ଚୋରଙ୍କୁ ବେଶ୍ ସୁହାଇଛି । ଏହା ପୁଣି ଅନ୍ୟ କୌଣସି ସ୍ଥାନରେ ନୁହେଁ, ଖୋଦ ଭୁବନେଶ୍ୱର କୋର୍ଟ ପରିସରରେ । ସିସିଟିଭି ଖରାପ ସୁରାକ ପାଇଁ ଚୋରମାନେ କୋର୍ଟ ପରିସରରୁ ଆଇନ୍ଜୀବୀଙ୍କ ହେଲମେଟ ନେଇ ଚମ୍ପଟ ମାରୁଛନ୍ତି । ସୋମବାର ଦିନ ଏଭଳି ଚୋରିର ଶିକାର ହୋଇଛନ୍ତି ବରିଷ୍ଠ ଆଇନ୍ଜୀବୀ ସୁକାନ୍ତ କୁମାର ସାହୁ । ଶ୍ରୀ ସାହୁ ସବୁଦିନ ଭଳି ସୋମବାର ମଧ୍ୟ କୋର୍ଟ ପରିସରରେ ନିଜର ମୋଟର ସାଇକେଲ ଓ ହେଲମେଟ ରଖି ଅଦାଲତକୁ ଯାଇଥିଲେ । କିଛି ସମୟ ପରେ ଫେରିଲା ବେଳକୁ ଆଉ ହେଲମେଟ ନାହିଁ । ମୁଣ୍ଡ ଉପରେ ସିସିଟିଭି ଲାଗିଥିବା ଦେଖି ଚୋରକୁ ଧରିବାପାଇଁ ଶ୍ରୀ ସାହୁ ଉଦ୍ୟମ କରିଥିଲେ । ଅଦାଲତ ପରିସରକୁ ଯାଇ ସିସିଟିଭି ଚିତ୍ର ଦେଖିବାକୁ ଉଦ୍ୟମ କରିଥିଲେ । ହେଲେ ଜଣାଗଲା ଯେ ସିସିଟିଭିଟି ଖରାପ । ଦୀର୍ଘଦିନ ଧରି କାମ କରୁନାହିଁ ।
ତେଣୁ ଚୋର ଚିହ୍ନିବାକୁ ଯାଇଥିବା ଶ୍ରୀ ସାହୁ ନିରାଶ ହୋଇ ଫେରିଥିଲେ । ଭୁବନେଶ୍ୱର କୋର୍ଟ ପରିସରରେ କିଛିଦିନ ତଳେ କର୍ତ୍ତୃପକ୍ଷ ବ୍ୟାପକ ଅର୍ଥ ବ୍ୟୟରେ ସିସିଟିଭି ଲଗାଇଥିଲେ । ଉଦ୍ଦେଶ୍ୟ ଥିଲା କୋର୍ଟକୁ ବିଭିନ୍ନ ସମୟରେ ଆସୁଥିବା ଛଦ୍ମବେଶୀ ଅପରାଧିଙ୍କୁ ଚିହ୍ନଟ କରିବା ସହିତ କୋର୍ଟ ପରିସରରେ ଗାଡିମୋଟରକୁ ସୁରକ୍ଷା ଦେବା । ଉଲ୍ଲେଖନୀୟ ଯେ ବିଭିନ୍ନ ପ୍ରକାରର ଅପରାଧିମାନେ କୋର୍ଟକୁ ବିଚାରପାଇଁ ଆସିଲା ବେଳକୁ ସେମାନଙ୍କ ସହଯୋଗୀମାନେ ଆସି ସେଠାରେ ପଇଁତରା ମାରନ୍ତି । ହେଲେ ସେମାନଙ୍କୁ ଚିହ୍ନିବା ପୁଲିସ୍ ପକ୍ଷରେ ସହଜ ହୋଇନଥାଏ । ତେଣୁ ଏହାକୁ ଦୃଷ୍ଟିରେ ରଖି କର୍ତ୍ତୃପକ୍ଷ ସିସିଟିଭି ଲଗାଇଥିଲେ । ହେଲେ ଏବେ ଫଳ ଶୂନ । କେବଳ ଭୁବନେଶ୍ୱର କୋର୍ଟ ପରିସର ନୁହେଁ ରାଜଧାନୀର ବିଭିନ୍ନ ଛକ ସ୍ଥାନରେ କମିଶନରେଟ ପୁଲିସ୍ ଲଗାଇଥିବା ସିସିଟିଭି ବି ଏକ ପ୍ରକାର ଅଚଳ । କେଉଁ କ୍ୟାମେରାରେ ଗାଡିର ଆଗପଟୁ ଫଟୋ ଉଠିପାରୁ ନାହିଁ ତ ଆଉ କେଉଁଠି ପଛପଟୁ ଫଟୋ ଉଠୁନାହିଁ ।ଫଳରେ ଏହା ମାଧ୍ୟମରେ ଚୋର ଧରିବା ପୁଲିସ୍ ପକ୍ଷରେ ଅସମ୍ଭବ ହେଉଛି । ରାତିବେଳା ତ ଅନେକ ସିସିଟିଭିରେ ଫଟୋ ଉଠିବା ସମ୍ଭବ ହେଉନାହିଁ । ଧର୍ମକୁ ଆଖିଠାର ମାରିଲା ଭଳି ସିସିଟିଭି ଭରସାରେ ପୁଲିସ୍ ବାବୁମାନେ କାମ ଚଳାଇ ନେଉଛନ୍ତି । ସ୍ମାର୍ଟସିଟି କର୍ତ୍ତୃପକ୍ଷ ସହରରେ ସିସିଟିଭି ଲଗାଇବା କାର୍ଯ୍ୟ ଆରମ୍ଭ କରିଥିଲେ ମଧ୍ୟ ତାହା କିଛିଦିନ ହେଲା ଅଧାପନ୍ତରିଆ ଅବସ୍ଥାରେ ଥିବା ଦେଖିବାକୁ ମିଳୁଛି । ରାସ୍ତା ଘାଟ ଠାରୁ କୋର୍ଟ କଚେରୀ ପର୍ଯ୍ୟନ୍ତ ଅଚଳ ସିସିଟିଭି ଯୋଗୁଁ ଚୋରମାନେ ଏବେ ଉତ୍ସାହିତ ବୋଲି କିଛି ପୁଲିସ୍ କର୍ମଚାରୀ ନାମ ଗୋପନ ସର୍ତ୍ତରେ ମତ ଦେଉଛନ୍ତି । ସରକାର ଅଧିକ ସିସିଟିଭି ଲଗାଇବା ତ ଦୂରରକଥା ଲାଗିଥିବା ସିସିଟିଭିର ରକ୍ଷଣାବେକ୍ଷଣ କରୁନଥିବାରୁ ଏଭଳି ଅବସ୍ଥା ସୃଷ୍ଟି ହୋଇଛି । ଯଦି ଭୁବନେଶ୍ୱର କୋର୍ଟ ପରିସରରେ ଏଭଳି ଅବସ୍ଥା ତେବେ ରାଜଧାନୀରେ କାହାକୁ କ’ଣ କହିବା ବୋଲି ଆଇନ୍ଜୀବୀମାନେ ମତ ଦେଉଛନ୍ତି ।