ଦୁଇ ପଟୁ ଆୟ : କାହାକୁ ନାହିଁ ପରବାୟ
ଭୁବନେଶ୍ୱର : ସାଧାରଣ ଲୋକଙ୍କ ଆସ୍ଥାଭାଜନ ହେବାପାଇଁ ପୁଲିସ୍ ବିଭାଗର ବଡ ବାବୁମାନେ ଯେତେ ପରାମର୍ଶ ଦେଲେ ବି ତାହାକୁ ଥାନା ସ୍ତରରେ ଅନେକ ମାନୁ ନାହାନ୍ତି । ବରଂ ଦୁଇ ପଟୁ ଆୟ- କାହାକୁ ନାହିଁ ପରବାୟ ନୀତିରେ କାର୍ଯ୍ୟ କରୁଥିବା ନେଇ ଆଲୋଚନା ହେଉଛି । ଏଭଳି ଆଲୋଚନା ପୁଣି ଆଉ କେଉଁଠି ନୁହେଁ, ଖୋଦ ରାଜଧାନୀରେ । ରାଜଧାନୀର ଗୋଟିଏ ଗୁରୁତ୍ୱପୂର୍ଣ୍ଣ ଥାନାରେ ଥିବା ଜଣେ ଦୁଇ ତାରକା ଯୁବ ଅଧିକାରୀଙ୍କ କାର୍ଯ୍ୟକଳାପ ଦେଖି ଲୋକେ ଏଭଳି ଆଲୋଚନା କରୁଛନ୍ତି । ବାବୁ ଚୋର, ଡାକୁଙ୍କୁ ଧରିବାରେ ଯେତେ ମାହାରି ନୁହନ୍ତି ଥାନାକୁ ମାମଲା ନେଇ ଆସୁଥିବା ଦୁଇ ପକ୍ଷଙ୍କୁ ଧରିବାରେ ତାହା ଠାରୁ ମାହାରି ବୋଲି କୁହାଯାଉଛି । ଯିଏ ମାଡ ଖାଇ ଆସିଲା ସିଏ ଦେଉଛି, ଯିଏ ମାଡ ଦେଇଛି ସିଏ ବି ଗଣୁଛି । ଯୁବ ଅଧିକାରୀ ଜଣଙ୍କ ଏଭଳି କାର୍ଯ୍ୟରେ ଏତେ ପାରଙ୍ଗମ ଯେ ଥାନା ବାବୁ ବି ତାଙ୍କ ଉପରେ ଶତ ପ୍ରତିଶତ ଭରସା କରି ଅଧିକାଂଶ ମାମଲାର ତଦନ୍ତକାରୀ ଅଫିସର (ଆଇଓ) ବନାଇ ଦେଉଛନ୍ତି ।
ଥାନାଟି ରହିଛି ବିମାନ ବନ୍ଦର ଆଖପାଖରେ । କିଛିଦିନ ତଳେ ଥାନା ଅଧିନରେ ଗୋଟିଏ ଇଲାକାରେ ପ୍ରେମଜନିତ ଘଟଣାକୁ ନେଇ ପ୍ରଥମେ ହାତାହାତି ଓ ପରେ କାତି ବୁଲିଲା । ଦୁଇ ପକ୍ଷ ଆହତ ହୋଇ ଥାନା ଓ ପରେ ଡାକ୍ତରଖାନା ଗଲେ । ଗୋଟିଏ ପକ୍ଷ ଟିକେ କମ୍ ଖଣ୍ଡିଆ ଖାବରା ହୋଇଥିଲେ । ଥାନା ପକ୍ଷରୁ ଏହି ମାମଲାରେ ଡାକ୍ତରୀ ରିପୋର୍ଟକୁ ଦେଖି ୩୦୭ ଦଫା ଲଗାଗଲା । ଦୁଇ ପକ୍ଷର କିଛି ଲୋକ ଜେଲ୍ ଗଲେ । ମାମଲାର ତଦନ୍ତ ଦାୟିତ୍ୱ ନେଲେ ଏହି ଦୁଇ ତାରକା ଅଫିସର । ପ୍ରଥମେ ଦୁଇ ପକ୍ଷର ଲୋକଙ୍କୁ ବାରମ୍ବାର ଥାନାକୁ ଡାକିଲେ । ପରେ ପୁଲିଆ ଷ୍ଟାଇଲରେ ଜେରା କଲେ । ତଦନ୍ତକାରୀ ଅଧିକାରୀ ହିସାବରେ କିନ୍ତୁ ସିଡି ଦେବାପାଇଁ ଖେଳିଲେ । ଦୁଇ ପକ୍ଷକୁ ଅଲଗା ଅଲଗା ଡାକି ସିଡି ପଠାଇବାପାଇଁ ପାଉଣା ନେଲେ । ଏମିତି ଭୟ ଦେଖାଇଲେ ଯେ ଦୁଇ ପକ୍ଷ ପ୍ରତିଯୋଗିତା ଭିତ୍ତିରେ ପଇସା ଦେଇ ଆସିଥିବା ଆଲୋଚନା ହେଉଛି । ତେବେ ଦୁଇ ପକ୍ଷର ମୋଟ୍ ପ୍ରଣାମି ମିଶି କୁଆଡେ ଛଅ ଅଙ୍କ ଛୁଇଁଛି । ତେବେ ମାଲ୍ ପାଇବାପରେ ତଦନ୍ତକାରୀ ଅଫିସର ସିଡିରେ କୁଆଡେ ଟିକେ କେଁ ରଖି ଦେଇଛନ୍ତି ।
ଦୁଇ ପକ୍ଷକୁ ସୁହାଇଲା ଭଳି ଏଭଳି କାରନାମା କରିଛନ୍ତି ଯେ ଆଗାମୀ ଦିନରେ ତାହା କ୍ଷେପଣାସ୍ତ୍ର ହୋଇ ତାଙ୍କରି ଆଡକୁ ଯିବାର ସମ୍ଭାବନା ରହିଛି । କ୍ଷେପଣାସ୍ତ୍ର ଗୋଡେଇଲା ବେଳକୁ ସହରରେ ନୂଆ ଡିସିପି ଆସିଯାଇଥିବେ ଓ ସେ କିଭଳି ପଦକ୍ଷେପ ନେବେ ତାହା ଉପରେ ଏବେ ସମସ୍ତଙ୍କ ନଜର । ତେବେ ସମ୍ପୃକ୍ତ ଥାନା ଆଖପାଖରେ ହେଉଥିବା ଆଲୋଚନା ଅନୁଯାୟୀ ଦୁଇ ତାରକା ବାବୁ ଦୁଇ ପଟୁ ଆୟ କରି କରି ଏତେ ସମ୍ପତ୍ତି କଲେଣି ଯେ ତାହାର ତାଲିକା ଲମ୍ବିବାରେ ଲାଗିଛି । ଅବଶ୍ୟ ଥାନାରେ ଥିବା ବାବୁଙ୍କର କିଛି ବନ୍ଧୁ ଏହି ତାଲିକାରେ ମୁଣ୍ଡିମାରି ନୂଆ ଡିସିପିଙ୍କୁ ଦେବାପାଇଁ ସଜବାଜ ହେଉଛନ୍ତି ।