ଭୁବନେଶ୍ୱର : କରୋନା ମୁକାବିଲା ଲାଗି ରାଜ୍ୟ ସରକାରଙ୍କ ଲକ୍ଡାଉନ୍ କଟକଣା ରାଜଧାନୀରେ ଲାଗୁ ହୋଇଥିବାବେଳେ ନିୟମ ଭାଙ୍ଗୁଥିବା ଅଧିକାଂଶ ଅମାନିଆ ହେଉଛନ୍ତି ସରକାରୀ ବାବୁ । ବଡି ଭୋରରୁ ଦିନ ଗୋଟାଏ ପର୍ଯ୍ୟନ୍ତ ହାଟ ବଜାରରୁ ଆରମ୍ଭକରି ରାସ୍ତାଘାଟରେ ବାବୁମାନେ ପଇଁତରା ମାରିବାରୁ ପୁଲିସ୍ ବି ନାକେଦମ ହେଲାଣି । କେଉଁଠି ମାଛହାଟରେ ଗୋଡାଇ ବାଡଉଛି ତ ଆଉ କେଉଁଠି ଫାଇନ୍ ଆଦାୟ କରୁଛି । ତେଣୁ ରାସ୍ତାଘାଟରେ ଅମାନିଆ ହେଉଥିବା ଏହି ସରକାରୀ କର୍ମଚାରୀଙ୍କ ସଂକ୍ରାନ୍ତରେ ତାଙ୍କ ଉପରିସ୍ଥ ଅଧିକାରୀଙ୍କୁ ଅବଗତ ପାଇଁ ଦାବି ହେଉଛି । ଲକ୍ଡାଉନ୍ କଟକଣା ଯୋଗୁଁ କମ୍ ସଂଖ୍ୟାରେ କର୍ମଚାରୀମାନେ ଅଫିସର ଆସିବାକୁ କୁହାଯାଇଛି । ଯେଉଁମାନେ ଆସିବେ ସେମାନେ ନାକାବନ୍ଦି ଦାୟିତ୍ୱରେ ଥିବା ପୁଲିସ୍ କର୍ମଚାରୀଙ୍କୁ ସେମାନଙ୍କ ଦପ୍ତରର ପରିଚୟପତ୍ର ଦେଖାଇ ଆସିପାରିବେ ବୋଲି କୁହାଯାଇଛି । ଏହି ମଉକାରେ ଅଧିକାଂଶ ସରକାରୀ ବାବୁ ଅଫିସ ଆସୁନାହାନ୍ତି । ହେଲେ ଘରେ ବି ରହୁନାହାନ୍ତି । ସକାଳେ ହେଲେ ଦୁଇଚକିଆ ଯାନ ଧରି ବଜାରକୁ ବାହାରି ପଡୁଛନ୍ତି । କିଏ ମାଛ ହାଟରେ ଗହଳି କରୁଛି ତ ଆଉ କିଏ ପରିବା ବଜାରରେ । ଯେହେତୁ ସକାଳ ୬ରୁ ଦିନ ଗୋଟାଏ ପର୍ଯ୍ୟନ୍ତ ଆବଶ୍ୟକ ସାମଗ୍ରୀ ଖରିଦ ପାଇଁ ପ୍ରଶାସନ ସମୟ ଦେଇଛି ବାବୁମାନେ ତାହାର ପୂରା ଫାଇଦା ଉଠାଇବାରେ ଲାଗିଛନ୍ତି ।

