୧୦୦ ନୁହେଁ ୧୧୭ରୁ ଅଧିକ ଆସନ ଜିତିବ ବିଜେଡି

ଭୁବନେଶ୍ବର () ପ୍ରଥମ ପର୍ଯ୍ୟାୟ ନିର୍ବାଚନକୁ ଆଉ ମାତ୍ର ଚାରି ଦିନ ପୂର୍ବରୁ ପ୍ରକାଶିତ ଇଣ୍ଡିଆ ଟିଭିର ସର୍ଭେ ରିପୋର୍ଟରେ କୁହାଯାଇଛି ଯେ, ବିଜେଡି 147 ବିଧାନସଭାରୁ 100ଟି ଆସନ ଜିତିବ । ବିଜେପି 31ଟି, କଂଗ୍ରେସ 9ଟି ଏବଂ ଅନ୍ୟମାନେ 7ଟି ଆସନ ଦଖଲେ କରିବେ । ସେହିଭଳି ଲୋକସଭାରେ 21ଟିରୁ 14ଟି ବିଜେଡି ଦଖଲ କରିବ ।

ଏଭଳି ପୋଲ ସର୍ଭେକୁ ଆଜି ବିଜେଡି ଖୋଲାଖୋଲି ଖଣ୍ଡନ କରିଛି । ଆଉ ଦାବି କରିଛି ଯେ, ବିଜେଡି ଗତ ବିଧାନସଭାର 117ରୁ ଅଧିକ ଆସନ ଜିତିବ । ବିଜେଡି ମୁଖପାତ୍ର ସସ୍ମିତ ପାତ୍ର ଅଭିଯୋଗ କରିଛନ୍ତି ଯେ, ଏହି ସର୍ଭେ ରିପୋର୍ଟଟି ବିଜେପି ସପକ୍ଷବାଦୀଙ୍କ ମତାମତକୁ ନେଇ ତିଆରି ହୋଇଛି । ଏହାଦ୍ବାରା ଦେଶରେ ଏନଡିଏ ବିପକ୍ଷରେ ଉଠୁଥିବା ସରକାର ବିରୋଧୀ ହାୱାକୁ ଚପେଇ ଦେବାକୁ ଉଦ୍ୟମ କରାଯାଉଛି ।

ବିଜେଡି ସୁପ୍ରିମୋ ନବୀନ ପଟ୍ଟନାୟକ ବାରମ୍ବାର କହିଛନ୍ତି ଯେ, ଦଳ ଏଥର ପୂର୍ବ ଅପେକ୍ଷା ଅଧିକ ସିଟ ଜିତବ । ଏପରିକି ଲୋକସଭା କ୍ଷେତ୍ରରେ ମଧ୍ୟ ଦଳ ଭଲ ପ୍ରଦର୍ଶନ କରିବ ବୋଲି ସେ କହିଛନ୍ତି । ସର୍ଭେ ରିପୋର୍ଟକୁ ପ୍ରତ୍ୟାକ୍ଷାନ କରି ସସ୍ମିତ କହିଛନ୍ତି ଯେ, ବିଜେଡି ଗତ ନିର୍ବାଚନ ତୁଳନାରେ ଅଧିକ ଆସନ ପାଇବୁ । ଓଡିଶାରେ ବିଜେଡି ବିରୋଧରେ ସରକାର ବିରୋଧୀ ହାୱା ନାହିଁ । କିନ୍ତୁ କେନ୍ଦ୍ରରେ ମୋଦି ସରକାର ବିରୋଧରେ ସରକାର ବିରୋଧୀ ହାୱା ରହିଛି ।

ଲୋକସଭା ଆସନରୁ ବିଜୟ ସମ୍ଭାବନା ନେଇ ସେ କହିଛନ୍ତି ଯେ, ବିଜେଡି 21ଟି ଲୋକସଭା ଆସନରୁ 20ଟିରେ ନିଶ୍ଚିତ ବିଜୟ ବାନା ଉଡାଇବ । ବିଜେଡି ଗତ 20 ବର୍ଷ ମଧ୍ୟରେ ରାଜ୍ୟରେ ଅନେକ ବିକାଶ ମୂଳକ କାମ କରିଛି । ସେହି ବିକାଶ ଏଜେଣ୍ଡାକୁ ନେଇ ଦଳ ଲୋକଙ୍କ ପାଖକୁ ଯାଉଛି ଏବଂ ଲୋକ ଏଥିପାଇଁ ଆମ ଉପରେ ଖୁସୀ । ବିଜେପିକୁ ସମାଲୋଚନା କରି ସେ କହିଛନ୍ତି ଯେ, ବିଜେପି 2014ରେ ଯେତିକି ଆସନ ଜିତିଥିଲା ଏଥର ସେତିକି ଆସନ ଜିତି ପାରିବନି ।

ଏହି ସର୍ଭେ ମାର୍ଚ୍ଚ 24ରୁ 31 ମଧ୍ୟରେ କରାଯାଇଥିଲା । ଏଥିରେ 65 ହଜାର 160ଜଣ ଲୋକଙ୍କ ମତାମତ ନିଆଯାଇଥିଲା । ସେ ମଧ୍ୟରୁ 34ହଜାର 272 ଜଣ ପୁରୁଷ ଏବଂ 30 ହଜାର 888 ଜଣ ମହିଳା ମତଦାତା ଥିଲେ ।