ଅମାନତ ହରା ପ୍ରାର୍ଥୀଙ୍କୁ ନେଇ ସରକାର ଗଠନର ଅଭିଯାନ

ଭୁବନେଶ୍ବର () ଘର ତିଆରି ସମୟରେ ଭିତ୍ତିଭୂମୀକୁ ଯେମିତି  ସୁଦୃଢ କରିବାକୁ ପଡିଥାଏ, ରାଜ୍ୟରେ ଶାସନ ଭାର ନେବାକୁ ହେଲେ ତୃଣମୂଳ ସ୍ତରରେ ସଂଗଠନକୁ ସେତିକି ମଜବୁତ କରିବାକୁ ପଡିଥାଏ । ଓଡିଶାରେ ମିଶନ 120 ପ୍ଲସର ନାରା ଦେଇ ସରକାର ଗଠନର ଦାବି କରୁଥିବା ରାଜ୍ୟ ଶାଖା ବିଜେପି ସେହିଭଳି ନିଅଁ ଦୁର୍ବଳ । ଅନ୍ୟ ଅର୍ଥରେ କହିବାକୁ ଗଲେ ପ୍ରାୟ 50 ପ୍ରତିଶତ ଅମାନତ ହରା ପ୍ରାର୍ଥୀଙ୍କୁ ନେଇ ଦଳ ସରକାର ଗଠନର ଅଭିଯାନ କରୁଛି ।

ଗତ ସଧାରଣ ନିର୍ବାଚନରେ ବିଜେପି 147ଟି ବିଧାନସଭା ଆସନରେ ଲଢିଥିବା ବେଳେ 77ଟି ଆସନରେ ଦଳୀୟ ପ୍ରାର୍ଥୀ ଅମାନତ ହରାଇଥିଲେ । ତେବେ ବିଜେପି ପ୍ରାର୍ଥୀ 10ଟି ବିଧାନସଭା କ୍ଷେତ୍ରରୁ ଜିତିଥିଲେ । 2014ରେ ପ୍ରଚଣ୍ଡ ମୋଦି ହ୍ବାଆ ଯୋଗୁଁ କେନ୍ଦ୍ରରେ ବିଜେପି ସରକାର ଗଠନ ପାଇଁ ସ୍ପଷ୍ଟ ବହୁମତ ପାଇଥିଲା । କିନ୍ତୁ ରାଜ୍ୟରେ ମୋଦି ହାୱା କାମ ଦେଇନଥିଲା । ବିଧାନସଭାରେ ବିଜେପି ଆସନ ସଂଖ୍ୟା 6ରୁ 10କୁ ବଢିଥିଲେ ବି 77 ଜଣ ପ୍ରାର୍ଥୀ ଅମାନତ ହରାଇଥିଲେ । ଦଳର ଜଣେ ମାତ୍ର ସଂସଦ ଭାବେ ନିର୍ବାଚିତ ହୋଇଥିଲେ । ବିଜେଡି ଗତ ନିର୍ବାଚନରେ 93 ଲକ୍ଷ 35 ହଜାରରୁ ଅଧିକ ଭୋଟ ଅର୍ଥାତ ଦଳର ଭୋଟ ହାର ଥିଲା 43.41 ପ୍ରତିଶତ । ସେହି ଅନୁପାତରେ ବିଜେପି 38 ଲକ୍ଷ 74ହଜାରରୁ ଅଧିକ ଭୋଟ ଅର୍ଥାତ 18.02 ପ୍ରତିଶତ ଭୋଟ ପାଇଥିଲା ।

ସେହିଭଳି କଂଗ୍ରେସ ମଧ୍ୟ ନୂଆ ନେତୃତ୍ବରେ ସରକାର ଗଠନ ପାଇଁ ଆବଶ୍ୟକ ସଂଖ୍ୟା ହାସଲ କରିବ ବୋଲି ଦାବି କରୁଛି । 2014ରେ କଂଗ୍ରେସର 40 ଜଣ ପ୍ରାର୍ଥୀ ଅମାନତ ହରାଇଥିଲେ । କଂଗ୍ରେସ ସପକ୍ଷରେ 55 ଲକ୍ଷ 35 ହଜାର ଅର୍ଥାତ 25.74 ପ୍ରତିଶତ ଭୋଟ ପାଇଥିଲା । ଦଳ ତରଫରୁ ବିଭିନ୍ନ ସାମ୍ବାଦିକ ସମ୍ମିଳନୀ ଓ ଟିଭି ଆଲୋଚନାରେ ଦମଦାର ଲଢେଇ କରୁଥିବା ନେତାମାନେ ନିର୍ବାଚନ ଜିତିବାକୁ ସକ୍ଷମ ହୋଇନାହାଁନ୍ତି । ବିଜେପିର ସେହିଭଳି କୁହାଳିଆ ନେତାମାନେ ନିର୍ବାଚନ ଜିତିବା ଦୂରର କଥା ଅମାନତ ମଧ୍ୟ ରକ୍ଷା କରିପାରିନାହାଁନ୍ତି । ମୋଟାମୋଟି ଭାବେ ଦେଖିବାକୁ ଗଲେ ବିଜେପି ଓ କଂଗ୍ରେସ କିଛି ହାରୁ ପାର୍ଟିଙ୍କ କାନ୍ଧରେ ସାହା ହୋଇ ସରକାର ଗଠନର ସ୍ବପ୍ନ ଦେଖୁଛନ୍ତି ।