ସଫାରି ଭିତରକୁ ଡେଇଁଲା ବାଘ, ଗାଡ଼ିରେ ଥିଲେ ୧୦ରୁ ଉର୍ଦ୍ଧ୍ୱ ପର୍ଯ୍ୟଟକ
ସଫାରି ଗାଡ଼ିରେ ବାଘ । ଗାଡ଼ିରେ ବସିଥିଲେ ୧୦ରୁ ଉର୍ଦ୍ଧ୍ୱ ପର୍ଯ୍ୟଟକ । ଘଟଣାଟି କ୍ୟାମେରାରେ ହୋଇଥିଲା କଏଦ୍ । ପରେ ଟ୍ୱିଟରରେ ଭିଡିଓ ହେଲା ଭାଇରାଲ । ୱାଇଲ୍ଡଲାଇଫରେ ରୁଚି ରଖୁଥିବା ବ୍ୟକ୍ତି ବିଭିନ୍ନ ଜଙ୍ଗଲ ଓ ଅଭୟାରଣ୍ୟର ଭ୍ରମଣରେ ଯିବାକୁ ଆଗଭର ଥାନ୍ତି । ଘଞ୍ଚ ଅରଣ୍ୟ ବୁଲିବା ପାଇଁ ଜଙ୍ଗଲ କର୍ତ୍ତୃପକ୍ଷଙ୍କ ତରଫରୁ ସଫାରିର ଆୟୋଜନ କରାଯାଇଥାଏ । ଅନେକ ସମୟରେ ସଫାରିରେ ଥିବା ଲୋକଙ୍କୁ ଦେଖି ବିଭିନ୍ନ ଜୀବଜନ୍ତୁ ଆକ୍ରମଣ କରିବାର ଭିଡିଓ ଆପଣ ଦେଖିଥିବେ । ହେଲେ ଜଙ୍ଗଲୀ ବାଘ ମଣିଷକୁ ଭକ୍ଷଣ କରିବା ପରିବର୍ତ୍ତେ ସ୍ନେହ ଓ ଆଦର କରୁଥିବାର ଦେଖିଛନ୍ତି କି ? ଟ୍ୱିଟରରେ ସେୟାର କରାଯାଇଥିବା ଏହି ଭିଡିଓଟି ଖୁବ୍ ଭାଇରାଲ ହେବାରେ ଲାଗିଛି । ଖୁବ୍ ଦ୍ରୁତଗତିରେ ଏକ ବାଘ ସଫାରି ଗାଡ଼ିକୁ ଡେଇଁ ପଡ଼ିବାର ଭିଡିଓରେ ଦେଖାଯାଉଛି । ଗାଡ଼ିରେ ବସିଥିବା ପର୍ୟ୍ୟଟକ ଭୟଭୀତ ହେବା ସ୍ୱାଭାବିକ । ହେଲେ ଏହା ପରବର୍ତ୍ତୀ ମୂହୁର୍ତ୍ତ ସମସ୍ତଙ୍କୁ ହତଚକିତ କରିଛି । ମଣିଷକୁ ଆକ୍ରମଣ କରିବା ପରିବର୍ତ୍ତେ କରୁଛି ଆଦର ଓ ସ୍ନେହ । ଛୋଟ ପିଲା ପରି ସମସ୍ତ ପର୍ୟ୍ୟଟକଙ୍କ ସହ ସ୍ନେହ କରୁଛି । ଭିଡିଓଟିକୁ ଯେ କେହି ବି ଦେଖିଲେ ବାଘଟି ପୋଷା ବୋଲି କହିବେ । କିନ୍ତୁ, ଏହା ପାଳିତ ବାଘ ନୁହେଁ । ଏ ହେଉଛି ଘଞ୍ଚ ଜଙ୍ଗଲରେ ବାସ କରୁଥିବା ମାଂସାହାରୀ ବାଘ । ଭିଡିଓଟି ସମସ୍ତଙ୍କୁ ଆଚମ୍ୱିତ କରିବା ସହ ବର୍ତ୍ତମାନ ପର୍ଯ୍ୟନ୍ତ ଏହା ୫.୭ ମିଲିୟନରୁ ଅଧିକ ସେୟାର ହୋଇଛି ।