Odia News Portal

ରାହୁଲଙ୍କ ଶତକ, ଭାରତର ଦବଦବା

ବ୍ୟାଟିଂରେ ଚମକିଲେ ଭାରତୀୟ ଖେଳାଳି । କେଏଲ୍ ରାହୁଲଙ୍କ ଦମଦାର ଶତକ ସହ ଅଧିନାୟକ ଶୁବମନ ଗିଲ୍‌, ଯଶସ୍ୱୀ ଜୟସ୍ୱାଲ, ଦେବଦତ୍ତ ପଡ଼ିକଲ୍ ଓ ଋଷଭ ପନ୍ତଙ୍କ ଅର୍ଦ୍ଧଶତକ । ୱେଲିଂଟନ୍ ଟେଷ୍ଟରେ ନ୍ୟୁଜିଲାଣ୍ଡ ଉପରେ ଚାପ ସୃଷ୍ଟି କରିଛି ଟିମ୍ ଇଣ୍ଡିଆ । ତୃତୀୟ ଦିନ ଖେଳ ଶେଷ ସୁଦ୍ଧା ୪ଟି ୱିକେଟ୍ ହରାଇ ୪୮୬ ରନ୍ ସଂଗ୍ରହ କରିବା ସହ ୧୧୮ ରନ୍‌ର ଅଗ୍ରଣୀ ହାସଲ କରିଛି ଭାରତ । ଶନିବାର ୧୫୯ ରନ୍‌ରୁ ନିଜ ଇନିଂସ ଆରମ୍ଭ କରିଥିବା ଭାରତ, ଦିନର ଖେଳରେ ବ୍ୟାଟିଂ ଦମ୍ ଦେଖାଇଥିଲା । ପୂର୍ବଦିନ ଅର୍ଦ୍ଧଶତକ କରି ଅପରାଜିତ ଥିବା କେଏଲ୍ ରାହୁଲ ନିଜର ୧୩ତମ ଟେଷ୍ଟ ଶତକ ପୂରଣ କରି ଦଳକୁ ମଜବୁତ ସ୍ଥିତିରେ ପହଞ୍ଚାଇଥିଲେ ।

ଦେବଦତ୍ତ ପଡ଼ିକଲ୍‌ଙ୍କ ସହ ରାହୁଲଙ୍କ ୧୬୫ ରନ୍‌ର ଦମଦାର ଭାଗୀଦାରି ଭାରତର ରନ୍‌କୁ ଆହୁରି ଆଗକୁ ବଢ଼ାଇଥିଲା । ପଡ଼ିକଲ୍ ୮୦ ରନ୍‌ର ଲଢ଼ୁଆ ପାଳି ଖେଳି କାଇଲ୍ ଜେମିସନ୍‌ଙ୍କ ବଲ୍‌ରେ ଆଉଟ୍ ହୋଇଥିଲେ । ଏହାପରେ କ୍ରିଜ୍‌ରେ ଆସିଥିଲେ ଅଧିନାୟକ ଶୁବମନ ଗିଲ୍ । ରାହୁଲ ଓ ଗିଲ୍‌ଙ୍କ ମଧ୍ୟରେ ୯୧ ରନ୍‌ର ଆଉ ଏକ ଉପଯୋଗୀ ଭାଗୀଦାରି ଭାରତର ସ୍ଥିତିକୁ ଆହୁରି ମଜବୁତ କରିଥିଲା । ରାହୁଲ ୧୩୬ ରନ୍‌ର ପାଳି ଖେଳି ଆଉଟ୍ ହୋଇଥିବାବେଳେ, ଗିଲ୍ ୯୮ ରନ୍‌ରେ ଆଉଟ୍ ହୋଇ ମାତ୍ର ୨ ରନ୍‌ ପାଇଁ ଶତକରୁ ବଞ୍ଚିତ ହୋଇଥିଲେ ।

ଅନ୍ୟପଟେ ଋଷଭ ପନ୍ତ ମଧ୍ୟ ନିଜର ଅର୍ଦ୍ଧଶତକ ପୂରଣ କରି ଅପରାଜିତ ରହିଛନ୍ତି । ଷ୍ଟମ୍ପସ୍‌ ବେଳକୁ ପନ୍ତଙ୍କ ସହ ଅଂଶୁଲ କମ୍ବୋଜ ୦ ରନ୍‌ରେ କ୍ରିଜ୍‌ରେ ରହିଥିଲେ । ଚତୁର୍ଥ ଦିନର ଖେଳରେ ଭାରତ ନିଜର ଅଗ୍ରଣୀକୁ ଆହୁରି ବଢ଼ାଇ ନ୍ୟୁଜିଲାଣ୍ଡ ଉପରେ ଚାପ ସୃଷ୍ଟି କରିବା ସହ ମ୍ୟାଚ୍‌କୁ ନିଜ ନିୟନ୍ତ୍ରଣରେ ରଖିବା ଲକ୍ଷ୍ୟରେ ରହିବ । ସୂଚନାଯୋଗ୍ୟ, ପ୍ରଥମେ ବ୍ୟାଟିଂ କରିଥିବା ନ୍ୟୁଜିଲାଣ୍ଡ ହେନେରୀ ନିକୋଲ୍ସଙ୍କ ଅପରାଜିତ ୧୭୫ ରନ୍ ଓ ଗ୍ଲେନ୍ ଫିଲିପ୍ସଙ୍କ ୧୧୮ ରନ୍‌ର ଦମଦାର ପାଳି ବଳରେ ୩୬୮ ରନ୍ କରି ଅଲ୍‌ଆଉଟ୍ ହୋଇଥିଲା । ଏବେ ଭାରତୀୟ ବ୍ୟାଟରଙ୍କ ଦମଦାର ପ୍ରଦର୍ଶନ ଦଳକୁ ମ୍ୟାଚ୍‌ରେ ଆଗୁଆ ସ୍ଥିତି ଦେଇଛି ।