ବନ୍ଦନା କଟାରିୟାଙ୍କ ହାଟ୍ରିକ ଗୋଲ
ନୂଆଦିଲ୍ଲୀ : ଟୋକିଓ ଅଲିମ୍ପିକ୍ସରୁ ଭାରତ ପାଇଁ ଆସିଛି ଖୁସି ଖବର। ଭାରତୀୟ ମହିଳା ହକି ଦଳ ଦକ୍ଷିଣ ଆଫ୍ରିକାକୁ ୪-୩ ଗୋଲରେ ପରାସ୍ତ କରିଛି। ଭାରତ ପାଇଁ ବନ୍ଦନା କଟାରିୟା ତିନୋଟି ଗୋଲ୍ ଦେଇଥିବା ବେଳେ ନେହା ଗୋୟଲ ଗୋଟିଏ ଗୋଲ ସ୍କୋର କରିଥିଲେ। ତେବେ ଅଲିମ୍ପିକ୍ସ ମ୍ୟାଚ୍ରେ ହ୍ୟାଟ୍ରିକ୍ ସ୍କୋର କରିଥିବା ବନ୍ଦନା କଟାରିୟା ପ୍ରଥମ ଭାରତୀୟ ମହିଳା ଖେଳାଳି ହୋଇ ପାରିଛନ୍ତି। ଭାରତୀୟ ହକି ଦଳର ଏହି ବିଜୟ ପରବର୍ତ୍ତୀ ରାଉଣ୍ଡକୁ ଯିବାର ଆଶା ସଞ୍ଚାର କରିଛି। ଯଦି ବ୍ରିଟେନ୍ ଆଜି ଆୟର୍ଲାଣ୍ଡକୁ ପରାସ୍ତ କରେ ତେବେ ଭାରତ କ୍ୱାର୍ଟର ଫାଇନାଲରେ ପ୍ରବେଶ କରିବ।-
ବନ୍ଦନା କଟାରିୟା ପ୍ରଥମ କ୍ୱାର୍ଟରରେ ଆରମ୍ଭରୁ ଭାରତ ପାଇଁ ଚମତ୍କାର ପ୍ରଦର୍ଶନ କରି ଚତୁର୍ଥ ମିନିଟ୍ରେ ଗୋଲ ଦେଇଥିଲେ। ତେବେ ପ୍ରଥମ କ୍ୱାର୍ଟରର ଅନ୍ତିମ ମୁହୂର୍ତ୍ତରେ ଦକ୍ଷିଣ ଆଫ୍ରିକା ସମାନ ଗୋଲ୍ ହାସଲ କରିଥିଲା। ଦ୍ୱିତୀୟ କ୍ୱାର୍ଟରରେ ମଧ୍ୟ ବନ୍ଦନା ଏକ ଆକ୍ରମଣାତ୍ମକ ଖେଳ ପ୍ରଦର୍ଶନ କରି ସ୍କୋର୍କୁ ୨-୧ରେ ପରିଣତ କରିଥିଲେ। ଦକ୍ଷିଣ ଆଫ୍ରିକା କିନ୍ତୁ ଦ୍ୱିତୀୟ ଥର ପାଇଁ ଭାରତର ଅତି ଦୁର୍ବଳ ଡିଫେନ୍ସ ଲାଇନକୁ ଭେଦ କରିଥିଲା। ପ୍ରଥମାର୍ଦ୍ଧରେ ମ୍ୟାଚ୍ ୨-୨ରେ ରହିଥିଲା। ତୃତୀୟ କ୍ୱାର୍ଟରରେ ନେହା ଗୋଏଲଙ୍କ ଗୋଲ ଦ୍ୱାରା ଭାରତ ପୁଣି ଥରେ ଜବରଦସ୍ତ ଆରମ୍ଭ କରିଥିଲା। ଭାରର ୩-୨ରେ ପହଞ୍ଚିଥିଲା। କିନ୍ତୁ ଦକ୍ଷିଣ ଆଫ୍ରିକା ଜବରଦସ୍ତ ପ୍ରତ୍ୟାବର୍ତ୍ତନ କରି ତୃତୀୟ ଗୋଲ ସ୍କୋର କରିଥିଲା। ମ୍ୟାଚ୍ର ୪୯ ମିନିଟ୍ରେ କଟାରିୟା ତୃତୀୟ ଗୋଲ୍ ସ୍କୋର୍ କରି ଭାରତକୁ ୪-୩ ଆଗରେ ରଖିଥିଲେ, ଯାହା ନିର୍ଣ୍ଣାୟକ ବୋଲି ପ୍ରମାଣିତ ହୋଇଥିଲା। ଦକ୍ଷିଣ ଆଫ୍ରିକା ପାଇଁ ଟ୍ୟାରିନ୍ ଗ୍ଲାସ୍ବୀ, ଅଧିନାୟକ ଏରିନ୍ ହଣ୍ଟର୍ ଓ ମାରିଜେନ୍ ମରାଇସ୍ ଗୋଲ୍ ଦେଇଥିଲେ।