ଗୁଇନ୍ଦା ଏଜେଣ୍ଟଙ୍କ ସହ ସମ୍ପର୍କ ରଖିବା କଥା ସ୍ୱୀକାର କଲେ ଜ୍ୟୋତି ମାଲହୋତ୍ରା

 ପାକିସ୍ତାନ ସହ ଭିତିରି  ସଂଯୋଗରେ ଥିବା ହରିୟାଣାର ୟୁଟ୍ୟୁବର ଜ୍ୟୋତି ମାଲହୋତ୍ରା ପାକିସ୍ତାନୀ ଗୁଇନ୍ଦା ଏଜେଣ୍ଟଙ୍କ ସହ ସମ୍ପର୍କ ରଖିବା କଥା ସ୍ୱୀକାର କରିଛନ୍ତି। ଜ୍ୟୋତି କହିଛନ୍ତି ଯେ ସେ ନୂଆଦିଲ୍ଲୀରେ ପାକିସ୍ତାନୀ ହାଇକମିସନର ଅଧିକାରୀ ଦାନିଶଙ୍କ ସହ ନିୟମିତ ଯୋଗାଯୋଗରେ ଥିଲେ।

ଗଣମାଧ୍ୟମ ସଂସ୍ଥା ଦ୍ୱାରା ପଚରାଉଚରା ବେଳେ ପ୍ରାପ୍ତ ସୂଚନା ଅନୁଯାୟୀ, ଜ୍ୟୋତି କହିଛନ୍ତି ଯେ ସେ ପ୍ରଥମେ ୨୦୨୩ ମସିହାରେ ପାକିସ୍ତାନ ଯାତ୍ରା କରିବା ପାଇଁ ଭିସା ପାଇଁ ହାଇକମିସନକୁ ଯାଇଥିବା ସମୟରେ ଦାନିଶ ଓରଫ ଏହସର ଦାରଙ୍କ ସହ ଯୋଗାଯୋଗରେ ଆସିଥିଲେ।

ପହଲଗାମ ଆକ୍ରମଣ ପରେ ପାକିସ୍ତାନ ସହିତ ଉତ୍ତେଜନା ମଧ୍ୟରେ ମେ ୧୩ ତାରିଖରେ ଭାରତ ଦ୍ୱାରା ବହିଷ୍କୃତ କୂଟନୀତିଜ୍ଞଙ୍କ ମଧ୍ୟରେ ଦାନିଶ ମଧ୍ୟ ଥିଲେ। ଯେଉଁ ଆକ୍ରମଣରେ ୨୬ ଜଣ ନୀରିହ ଜନତାଙ୍କ ମୃତ୍ୟୁ ହୋଇଥିଲା।

‘ଟ୍ରାଭେଲ୍ ୱିଥ୍ ଜୋ’ ନାମକ ୟୁଟ୍ୟୁବ୍ ଚ୍ୟାନେଲ୍ ଚଲାଉଥିବା ଜ୍ୟୋତିଙ୍କ ପ୍ଲାଟଫର୍ମରେ ପ୍ରାୟ ୪ ଲକ୍ଷ ସବସ୍କ୍ରାଇବର୍ ଅଛନ୍ତି।

ସୂତ୍ର ଅନୁଯାୟୀ, ପଚରାଉଚରା ସମୟରେ ଜ୍ୟୋତି କହିଛନ୍ତି, “୨୦୨୩ ମସିହାରେ, ମୁଁ ପାକିସ୍ତାନ ଯାତ୍ରା ପାଇଁ ଭିସା ବିଷୟରେ ପଚାରିବା ପାଇଁ ଦିଲ୍ଲୀରେ ଥିବା ପାକିସ୍ତାନ ହାଇକମିସନ୍ ଯାଇଥିଲି।”

୩୩ ବର୍ଷୀୟା ଯୁବତୀ କହିଛନ୍ତି ଯେ ତାଙ୍କ ପାକିସ୍ତାନ ଗସ୍ତ ସମୟରେ, ସେ ଦାନିଶଙ୍କ ସହଯୋଗୀ ଅଲି ହାସନଙ୍କୁ ଭେଟିଥିଲେ, ଯିଏ ତାଙ୍କ ରହିବା ଏବଂ ଯାତ୍ରା ବ୍ୟବସ୍ଥା କରିଥିଲେ।