ଚିନି ପାଇକାରୀ ଦର ୧୫% କମିଲା
ଚିନି ଦରକୁ ନେଇ ଖାଉଟିଙ୍କ ପାଇଁ ଆସିଛି କିଛିଟା ଆଶ୍ୱସ୍ତିର ଖବର। କେନ୍ଦ୍ର ସରକାର ୧୦ ଲକ୍ଷ ଟନ୍ ଅଶୋଧିତ ଚିନି ଶୁଳ୍କମୁକ୍ତ ଭାବେ ଆମଦାନିକୁ ଅନୁମତି ଦେବା ସହ ମହଜୁଦକାରୀଙ୍କ ଉପରେ କଡ଼ା ନଜର ରଖିଛନ୍ତି। ଏହାର ପ୍ରଭାବରେ ପାଇକାରୀ ବଜାରରେ ଚିନି ଦର ପ୍ରାୟ ୧୫ ପ୍ରତିଶତ ହ୍ରାସ ପାଇଛି। ଗତ ତିନି ଦିନ ମଧ୍ୟରେ କାରଖାନା ଦ୍ୱାର ଦର କ୍ୱିଣ୍ଟାଲ ପିଛା ପ୍ରାୟ ୮୦୦ ଟଙ୍କା କମିଥିବା ବେଳେ ବର୍ତ୍ତମାନ ପାଇକାରୀ ବଜାରରେ ଚିନି କିଲୋ ପିଛା ପ୍ରାୟ ୬୨ ଟଙ୍କାରେ ବିକ୍ରି ହେଉଛି। ବଜାରକୁ ଯୋଗାଣ ଆହୁରି ବଢ଼ିଲେ ଦର ପ୍ରାୟ ୩ ଟଙ୍କା ପର୍ଯ୍ୟନ୍ତ କମିପାରେ ବୋଲି ବ୍ୟବସାୟୀମାନେ ଆଶା କରୁଛନ୍ତି। କେନ୍ଦ୍ର ସରକାରଙ୍କ ଆକଳନ ଅନୁଯାୟୀ, ଦେଶରେ ବର୍ତ୍ତମାନ ପ୍ରାୟ ୩୬ ଲକ୍ଷ ଟନ୍ ଚିନି ମହଜୁଦ ରହିଛି। ଏହା ସହ ୧୦ ଲକ୍ଷ ଟନ୍ ଅଶୋଧିତ ଚିନି ଆମଦାନି ହେଲେ ନୂଆ ଆଖୁ ପେଡ଼ା ଋତୁ ଆରମ୍ଭ ହେବା ପର୍ଯ୍ୟନ୍ତ ଦେଶରେ ଚିନି ଯୋଗାଣ ପର୍ଯ୍ୟାପ୍ତ ରହିବ। ଆସନ୍ତା ଅକ୍ଟୋବର ମଧ୍ୟଭାଗରୁ ଚିନି କଳଗୁଡ଼ିକରେ ନୂଆ କ୍ରସିଂ ଆରମ୍ଭ ହେବାର ଆଶା ରହିଛି। ଏହା ଫଳରେ ଚିନିର ଉପଲବ୍ଧତା ବଢ଼ିବା ସହ ପାର୍ବଣ ଋତୁ ପୂର୍ବରୁ ଦର ଉପରେ ଥିବା ଚାପ ମଧ୍ୟ କମିପାରେ।
ତେବେ ପାଇକାରୀ ବଜାରରେ ଦର କମିଥିଲେ ମଧ୍ୟ ଏହାର ପ୍ରଭାବ ଏପର୍ଯ୍ୟନ୍ତ ଖୁଚୁରା ବଜାରରେ ସ୍ପଷ୍ଟ ହୋଇନାହିଁ। ବର୍ତ୍ତମାନ ଖୁଚୁରା ବଜାରରେ ଚିନି କିଲୋ ପିଛା ପ୍ରାୟ ୭୫ ଟଙ୍କାରେ ବିକ୍ରି ହେଉଛି। ଅଧିକ ଦରରେ କିଣାଯାଇଥିବା ପୁରୁଣା ଷ୍ଟକ୍ ବ୍ୟବସାୟୀଙ୍କ ପାଖରେ ଥିବାରୁ ଖୁଚୁରା ଦର ତୁରନ୍ତ କମାଇବା ସମ୍ଭବ ହେଉନାହିଁ। ପୁରୁଣା ଷ୍ଟକ୍ ଶେଷ ହୋଇ ନୂଆ ଓ ଶସ୍ତା ଯୋଗାଣ ବଜାରକୁ ଆସିଲେ ଖୁଚୁରା ଦର ମଧ୍ୟ କମିବ ବୋଲି ବ୍ୟବସାୟୀମାନେ ଆଶା ରଖିଛନ୍ତି। ଦର ଆହୁରି କମିବ ବୋଲି ଆଶା କରି କିଛି ଖାଉଟି ମଧ୍ୟ ଏବେ ଅଧିକ ପରିମାଣରେ ଚିନି କିଣିବା ପରିବର୍ତ୍ତେ କମ୍ ପରିମାଣରେ କିଣୁଥିବା ଦେଖାଯାଉଛି।
ଅନ୍ୟପକ୍ଷରେ ଚିନି ଦର ହ୍ରାସ ପରେ ଆଖୁଚାଷୀଙ୍କ ଦାବି ମଧ୍ୟ ସାମ୍ନାକୁ ଆସିଛି। ୨୦୨୫-୨୬ ଋତୁରେ ସମବାୟ ଚିନି କଳରେ ପେଡ଼ା ହୋଇଥିବା ଆଖୁ ପାଇଁ ଟନ୍ ପିଛା ଅତିରିକ୍ତ ୩୦୦ ଟଙ୍କା ପ୍ରଦାନ କରିବାକୁ ସ୍ୱାଭିମାନୀ ଶେତକାରୀ ସଂଗଠନ ଦାବି କରିଛି। ଚିନିର ଅଧିକ ଦରରୁ ମିଳିଥିବା ଅତିରିକ୍ତ ଆୟର ଏକ ଅଂଶ ଚାଷୀଙ୍କୁ ଦେବାକୁ ମଧ୍ୟ ସଂଗଠନ ଦାବି କରିଛି। ଏଭଳି ପରିସ୍ଥିତିରେ ସରକାରଙ୍କ ପାଇଁ ଏକପଟେ ଖାଉଟିଙ୍କୁ ମହଙ୍ଗା ଚିନିରୁ ରାହାତ ଦେବା ଏବଂ ଅନ୍ୟପଟେ ଆଖୁଚାଷୀ ଓ ଚିନି ଶିଳ୍ପର ସ୍ୱାର୍ଥ ମଧ୍ୟରେ ସନ୍ତୁଳନ ରକ୍ଷା କରିବା ବଡ଼ ଚ୍ୟାଲେଞ୍ଜ ହୋଇଛି। ଏବେ ସମସ୍ତଙ୍କ ନଜର ରହିଛି—ପାଇକାରୀ ବଜାରରେ ଦେଖାଦେଇଥିବା ଦର ହ୍ରାସ କେତେ ଶୀଘ୍ର ଖୁଚୁରା ବଜାରରେ ପହଞ୍ଚୁଛି। ଏହା ଉପରେ ହିଁ ଖାଉଟିଙ୍କ ପ୍ରକୃତ ରାହାତ ନିର୍ଭର କରିବ।