୯୫ ପ୍ରତିଶତ ପୋଡ଼ିଯାଇଛନ୍ତି ଛାତ୍ରୀ : ଡାକ୍ତର କହୁଛନ୍ତି
ଭୟଙ୍କର, ହୃଦୟ ବିଦାରକ…ଅଧ୍ୟାପକଙ୍କ ନିର୍ଯାତନାରେ ଅତିଷ୍ଠ ହୋଇ ଶେଷରେ ନିଜ ଦେହରେ ନିଆଁ ଲଗାଇଦେଲେ ଛାତ୍ରୀ । ସର୍ବସମ୍ମୁଖରେ ପେଟ୍ରୋଲ ଢାଳି ନିଆଁ ଲଗାଇଦେଲେ । ସ୍ଥିତି ଏମିତି ହେଲା ବାଲେଶ୍ବରରୁ ଏମ୍ସକୁ ତାଙ୍କୁ ସ୍ଥାନାନ୍ତର କରିବାକୁ ପଡ଼ିଲା । ପୂରା ରାଜ୍ୟରେ ଯାହା କେବେ ଘଟିନଥିଲା ଏବେ ବାଲେଶ୍ବରରେ ତାହା ହେଲା । ବାରମ୍ବାର ଅଭିଯୋଗ କରିବା ପରେ ବି କୌଣସି ଆକ୍ସନ ନହେବାରୁ ଏମିତି ଚରମ ନିଷ୍ପତ୍ତି ନେବାକୁ ବାଧ୍ୟ ହେଲେ ଛାତ୍ରୀ । ଯାହା ରାଜ୍ୟରେ କେବଳ ଚର୍ଚ୍ଚା ହେଉଛି ତାହା ନୁହେଁ ବରଂ ରାଜନୀତି ବି ତେଜିବାରେ ଲାଗିଛି ।
ଏମ୍ସରେ ବାଲେଶ୍ବର ଛାତ୍ରୀ
ନିର୍ଦ୍ଦେଶକ କହିଲେ ୨୪ ଘଣ୍ଟା ଅତି ଗୁରୁତ୍ବପୂର୍ଣ୍ଣ
ଶରୀରର ୯୫ ପ୍ରତିଶତ ଜଳିଯାଇଛି
ଜୀବନ ସହ ସଂଗ୍ରାମ କରୁଛନ୍ତି ଛାତ୍ରୀ
ଏମ୍ସର ବର୍ଣ୍ଣ ୱାର୍ଡରେ ଯନ୍ତ୍ରଣାରେ ଛଟପଟ ହେଉଛନ୍ତି
ବାଲେଶ୍ବର ଫକୀରମୋହନ ବିଶ୍ବବିଦ୍ୟାଳୟ ଛାତ୍ରୀ ଆତ୍ମହତ୍ୟା ଉଦ୍ୟମ ଘଟଣା , ଏମ୍ସ ବର୍ଣ୍ଣ ୱାର୍ଡରେ ଜୀବନ ସହ ସଂଘର୍ଷ କରୁଛନ୍ତି ପୀଡ଼ିତା । ଏମ୍ସର ନିର୍ଦ୍ଦେଶକଙ୍କ କହିବା ଅନୁସାରେ, ତାଙ୍କ ଶରୀରର ୯୫ ପ୍ରତିଶତ ପୋଡ଼ିଯାଇଛି । ଛାତ୍ରୀ ଜଣକ ଅତି ସଙ୍କଟାପନ୍ନ ଅବସ୍ଥାରେ ଥିବା ଏମ୍ସ ନିର୍ଦ୍ଦେଶକ ଡାକ୍ତର ଆଶୁତୋଷ ବିଶ୍ବାସ ସୂଚନା ଦେଇଛନ୍ତି । ୧୨ ଜଣିଆ ଡାକ୍ତରୀ ଦଳ ଚିକିତ୍ସାରେ ନିୟୋଜିତ ରହିଛନ୍ତି । ଏମିତିକି ଗତକାଲି ଏୟାରଲିଫ୍ଟ କରାଯିବା ନେଇ ଚର୍ଚ୍ଚା ହେଉଥିବା ବେଳେ ସ୍ବାସ୍ଥ୍ୟାବସ୍ଥା ଅତି ଗୁରୁତର ଥିବାରୁ ସ୍ଥାନାନ୍ତର ସମ୍ଭବ ନୁହେଁ ବୋଲ ଡାକ୍ତର କହିଛନ୍ତି । ତେଣୁ ଏବେ ଏମ୍ସର ବର୍ଣ୍ଣ ୱାର୍ଡରେ ସେ ଚିକିତ୍ସାଧୀନ ଅଛନ୍ତି ।
ଏମ୍ସରେ ପହଞ୍ଚୁଛନ୍ତି ରାଜନେତା
ଦୋଷୀଙ୍କ ବିରୋଧରେ କଡ଼ା ଆକ୍ସନର ମିଳିଛି ପ୍ରତିଶ୍ରୁତି
ବାଲେଶ୍ବର ଛାତ୍ରୀ ଆତ୍ମହତ୍ୟା ଉଦ୍ୟମର ଘଟଣା ସାମ୍ନାକୁ ଆସିବା ପରେ ରାଜନୀତି ବି ଜୋର ଧରିଛି । ଅଭିଯୋଗ ହେବା ପରେ କାହିଁକି କଲେଜ୍ କର୍ତ୍ତୃପକ୍ଷ କୌଣସି କାର୍ଯ୍ୟାନୁଷ୍ଠାନ ନେଲେ ନାହିଁ ତାହାକୁ ନେଇ ବି ନାନାପ୍ରଶ୍ନ ଉଙ୍କି ମାରୁଛି । ଖାଲି ଏତିକି ନୁହେଁ ବରଂ ବିଜେଡି ଓ କଂଗ୍ରେସ ଏ ପ୍ରସଙ୍ଗରେ ସରକାରଙ୍କୁ ଘେରିଥିବା ବେଳେ ସରକାର ନାରୀ ସୁରକ୍ଷାରେ ସଂପୂର୍ଣ୍ଣ ଫେଲ୍ ବୋଲି ଅଭିଯୋଗ କରିଛନ୍ତି । ଖାଲି ଏତିକି ନୁହେଁ ବରଂ ବିଭାଗୀୟ ମନ୍ତ୍ରୀ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ।
ସମ୍ପୃକ୍ତ ଛାତ୍ରୀଙ୍କ ଅଭିଯୋଗ, ବି.ଏଡ ବିଭାଗର ମୁଖ୍ୟ ସମୀର ସାହୁ ତାଙ୍କୁ ନିର୍ଯାତନା ଦେଉଥିଲେ ।
– ଅଶାଳୀନ ବ୍ୟବହାର ସହ ଫାଇଦା ମାଗୁଥିଲେ
– ରାଜି ନହେବାରୁ ପରୀକ୍ଷା ଦେବାକୁ ଦିଆଯାଇନଥିଲା
– ଉପସ୍ଥିତି କମ୍ ଦର୍ଶାଇ ହଇରାଣ କରାଯାଉଥିଲା
ସୂଚନା ମୁତାବକ, ଆତ୍ମହତ୍ୟା ଉଦ୍ୟମ କରିବା ଆଗରୁ ସମ୍ପୃକ୍ତ ଛାତ୍ରୀ କଲେଜ ଅଧ୍ୟକ୍ଷ ଦିଲ୍ଲୀପ ଘୋଷଙ୍କ ନିକଟରେ ଅଭିଯୋଗ କରିଥିଲେ । ହେଲେ କଲେଜ ଅଧ୍ୟକ୍ଷ ସଂପୃକ୍ତ ଛାତ୍ରୀଙ୍କୁ ବୁଝାଇବାକୁ ଉଦ୍ୟମ କରିଥିଲେ । ଆଉ ଅଧ୍ୟକ୍ଷ ରୁମରୁ ବାହାରି ନିଜ ଦେହରେ ନିଆଁ ଲଗାଇଦେଇଥିଲେ ସମ୍ପୃକ୍ତ ଛାତ୍ରୀ । ତେବେ ଭଗବାନଙ୍କ ପାଖରେ ଏତିକି ପ୍ରାର୍ଥନା ସଂପୃକ୍ତ ଛାତ୍ରୀ ତୁରନ୍ତ ସୁସ୍ଥ ହୁଅନ୍ତୁ ।