୭-୧୩ ବର୍ଷ ବୟସର ପିଲାଙ୍କୁ ନିଯୁକ୍ତି ଦେଉଛନ୍ତି ଜୈସ୍ ଓ ଲସ୍କର
ପାକିସ୍ତାନ ଓ ପାକ୍-ଅଧିକୃତ କାଶ୍ମୀରରେ ଧାର୍ମିକ ସମାବେଶ, ରାଲି ଓ ଆତଙ୍କବାଦୀ ତାଲିମ ଶିବିର ଆୟୋଜନ କରିବା ପରେ ଆତଙ୍କବାଦୀ ସଂଗଠନ ଜୈସ-ଏ-ମହମ୍ମଦ ଓ ଲସ୍କର-ଏ-ତୋଇବା ବର୍ତ୍ତମାନ ବିଦ୍ୟାଳୟ ଉପରେ ଧ୍ୟାନ ଦେଇଛନ୍ତି। ରିପୋର୍ଟ ଅନୁଯାୟୀ, ଏହି ସଂଗଠନଗୁଡ଼ିକ ନୂତନ ପିଢ଼ିର ଆତଙ୍କବାଦୀ ଗଠନ ପାଇଁ ଛାତ୍ରମାନଙ୍କୁ ନିଯୁକ୍ତି ଦେଉଛନ୍ତି।ପାକିସ୍ତାନର ପ୍ରମୁଖ ସହର ଓ ପିଓକେ ଅଞ୍ଚଳରେ ପୋଷ୍ଟର ଓ ବିଜ୍ଞାପନ ଦେଖିବାକୁ ମିଳିଛି, ଯେଉଁଥିରେ ଅଭିଭାବକମାନଙ୍କୁ ୭ରୁ ୧୩ ବର୍ଷ ବୟସର ପିଲାମାନଙ୍କୁ ଗୋଷ୍ଠୀ ଦ୍ୱାରା ପରିଚାଳିତ ବିଦ୍ୟାଳୟରେ ନାମ ଲେଖାଇବାକୁ ଉତ୍ସାହିତ କରାଯାଇଛି। ଶିକ୍ଷା ସହ ମାଗଣା ଭୋଜନ ଓ ମାସିକ ଭତ୍ତାର ଲୋଭ ଦେଖାଯାଉଛି।ଏହା ବ୍ୟତୀତ ଏହି ସଂଗଠନଗୁଡ଼ିକ ଇସଲାମିକ ନୀତି ଉପରେ ଆଧାରିତ ଯୁଦ୍ଧ ତାଲିମ ପ୍ରଦାନ କରୁଛନ୍ତି। ଏହି ଆତଙ୍କବାଦୀ ସଂଗଠନର ସଦସ୍ୟମାନେ ଭାଷଣ ଦେବା ପାଇଁ ପିଓକେର ସରକାରୀ ଓ ବେସରକାରୀ ବିଦ୍ୟାଳୟ ପରିଦର୍ଶନ କରୁଛନ୍ତି। ଆତଙ୍କବାଦୀ ଥିମ୍ ଥିବା ପୋଷାକ ପ୍ରତିଯୋଗିତା ଏବଂ କାଶ୍ମୀରରେ ନିହତ ଆତଙ୍କବାଦୀଙ୍କୁ ଗୌରବାନ୍ୱିତ କରିବା ତଥା ମୁସଲମାନ ଅତ୍ୟାଚାରର ମନଗଢ଼ା କାହାଣୀ ପ୍ରଚାର କରିବା ପାଇଁ ନାଟକ ମଞ୍ଚସ୍ଥ କରାଯାଉଛି।ଆତଙ୍କବାଦୀ ସଂଗଠନଗୁଡ଼ିକ ଗତ ବର୍ଷ ସେପ୍ଟେମ୍ବରରେ ବିଦ୍ୟାଳୟରେ ଆତଙ୍କବାଦୀ ମାନସିକତା ସୃଷ୍ଟି କରିବା ପାଇଁ ଷଡ୍ଯନ୍ତ୍ର ଆରମ୍ଭ କରିଥିଲେ ଏବଂ ଅନ୍ୟ ଆତଙ୍କବାଦୀ ସଂଗଠନ ଅପେକ୍ଷା ଜୈସ-ଏ-ମହମ୍ମଦ ଏହି ପ୍ରୟାସରେ ଅଧିକ ସକ୍ରିୟ ରହିଛି। ଲସ୍କର-ଏ-ତୋଇବାର କାର୍ଯ୍ୟକଳାପ ଏହାର ସହଯୋଗୀ ସଂସ୍ଥା ଦ୍ୱାରା ପରିଚାଳିତ ବିଦ୍ୟାଳୟରେ ସୀମିତ। ଜୈସ-ଏ-ମହମ୍ମଦ ସରକାରୀ, ବେସରକାରୀ ଓ ଅନ୍ୟାନ୍ୟ ବିଦ୍ୟାଳୟରେ ମଧ୍ୟ ନିଜର ପ୍ରଭାବ ବିସ୍ତାର କରୁଛି। ଛାତ୍ରମାନଙ୍କ ପାଇଁ ବିଦ୍ୟାଳୟ ବାହାରେ ଜିହାଦୀ କାର୍ଯ୍ୟକ୍ରମ ଚାଲିଛି। ଏହି ସଂଗଠନଗୁଡ଼ିକ ମୁଖ୍ୟତଃ ଆର୍ଥିକ ଅନଗ୍ରସର ପରିବାରକୁ ଟାର୍ଗେଟ୍ କରନ୍ତି। ପିଓକେର ଅନେକ ଅଭିଭାବକ ସେମାନଙ୍କ ପିଲାମାନଙ୍କୁ ବର୍ତ୍ତମାନର ବିଦ୍ୟାଳୟରୁ ନାମ କଟାଇ ବାହାବଲପୁର, ଲାହୋର, ମୁରିଦକେ ଓ କରାଚୀରେ ଥିବା ଏହି ଆତଙ୍କବାଦୀ ବିଦ୍ୟାଳୟକୁ ପଠାଇଛନ୍ତି।