ରୁଷ ରାଷ୍ଟ୍ରପତି ପୁଟିନଙ୍କୁ ଗୀତା ଉପହାର ଦେଲେ ପ୍ରଧାନମନ୍ତ୍ରୀ ମୋଦି, ରୁଷ ଭାଷାରେ ଥିଲା ଲିଖିତ

ରୁଷ ରାଷ୍ଟ୍ରପତି ପୁଟିନଙ୍କୁ ଗୀତା ଉପହାର ।  ରୁଷ ଭାଷାରେ ଲିଖିତ ଗୀତାକୁ ଉପହାର ଭାବେ, ପୁଟିନଙ୍କୁ ପ୍ରଦାନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ରାତିରେ ପ୍ରଧାନମନ୍ତ୍ରୀଙ୍କ ବାସ ଭବନରେ ନୈଶ୍ୟ ଭୋଜନ କରିଥିଲେ ପୁଟିନ । ଏହି ଅବସରେ ବିଭିନ୍ନ ପ୍ରସଙ୍ଗରେ ଆଲୋଚନା ସହ ଗୀତା ଉପହାର ଦେଇଛନ୍ତି ।  ସୋସିଆଲ ମିଡିଆରେ ସୂଚନା ଦେଇ ମୋଦି ଲେଖିଛନ୍ତି, ରାଷ୍ଟ୍ରପତି ପୁଟିନଙ୍କୁ ରୁଷିଆ ଭାଷାରେ ଗୀତାର ଏକ କପି ପ୍ରଦାନ କଲି । ଗୀତାର ଶିକ୍ଷା ବିଶ୍ୱର ଲକ୍ଷ ଲକ୍ଷ ଲୋକଙ୍କୁ ପ୍ରେରଣା ଦିଏ ।

ଗୁରୁବାର ସନ୍ଧ୍ୟାରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ତାଙ୍କର ଦୁଇ ଦିନିଆ ଭାରତ ଗସ୍ତ ଆରମ୍ଭ କରିଛନ୍ତି ।  ଚାରି ବର୍ଷରୁ ଅଧିକ ସମୟ ମଧ୍ୟରେ ପୁଟିନଙ୍କ ପ୍ରଥମ ଭାରତ ଗସ୍ତ ।  ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରୋଟୋକଲ ଭାଙ୍ଗି ବ୍ୟକ୍ତିଗତ ସ୍ୱାଗତ ପାଇଁ ବିମାନ ବନ୍ଦର ଯାଇଥିଲେ ।  କେବଳ ସେତିକି ନୁହଁ ଉଭୟ ନେତା ଗୋଟିଏ କାରରେ ବସି ଯାତ୍ରା କରିଥିଲେ ।  ପ୍ରଧାନମନ୍ତ୍ରୀଙ୍କ ବାସଭବନ ୭ ଲୋକ କଲ୍ୟାଣ ମାର୍ଗରେ ପହଞ୍ଚି ରାତ୍ରୀଭୋଜନ କରିଥିଲେ ।  ମୋଦି କହିଛନ୍ତି, ମୋର ବନ୍ଧୁ ରାଷ୍ଟ୍ରପତି ପୁଟିନଙ୍କୁ ଦିଲ୍ଲୀରେ ସ୍ବାଗତ କରି ଖୁସି ଅନୁଭବ କରୁଛି। ଭାରତ ଏବଂ ରୁଷର ବନ୍ଧୁତା ବହୁ ପରୀକ୍ଷିତ ।  ଏଥିରୁ ଆମ ଲୋକଙ୍କୁ ବହୁତ ଲାଭ ମିଳିଛି ।