ସୋଆକୁ “ଆନନ୍ଦପୂର୍ଣ୍ଣ ଶିକ୍ଷାନୁଷ୍ଠାନ” ମାନ୍ୟତାରେ ସମ୍ମାନିତ

ଭୁବନେଶ୍ୱର: ଦେଶର ଶ୍ରେଷ୍ଠ ଶିକ୍ଷାନୁଷ୍ଠାନ ତାଲିକାରେ ଥିବା ଶିକ୍ଷା ଓ ଅନୁସନ୍ଧାନ (ସୋଆ)କୁ ମିଳିଛି ଆଉ ଏକ ସଫଳତା । କ୍ୟୁଏସ୍ ଆଇ-ଗଜ୍ ଦ୍ୱାରା ପ୍ରସ୍ତୁତ “ଆନନ୍ଦପୂର୍ଣ୍ଣ ଶିକ୍ଷାନୁଷ୍ଠାନ” ତାଲିକାରେ ସୋଆକୁ ସ୍ଥାନ ମିଳିଛି । ୟୁକେ ସ୍ଥିତ କ୍ୟୁଏସ୍ କ୍ୱାକ୍କ୍ୱାରେଲି ସିମଣ୍ଡସର ଭାରତୀୟ ଶାଖା କ୍ୟୁଏସ୍ ଆଇ-ଗଜ ଏବଂ ଆସୋଚାମ୍ ସହଯୋଗରେ ଭାରତର ୧୦୦ ରୁ ଅଧିକ ଶିକ୍ଷାନୁଷ୍ଠାନକୁ ନେଇ ଗଭୀର ଆଲୋଚନା ପର୍ଯ୍ୟାଲୋଚନା ପରେ ୩୩ଟି ବିଶ୍ୱବିଦ୍ୟାଳୟ, କଲେଜ ଏବଂ ସ୍କୁଲ୍କୁ ଏହି “ଆନନ୍ଦପୂର୍ଣ୍ଣ ଶିକ୍ଷାନୁଷ୍ଠାନ” ସ୍ଥାନୀତ କରାଯାଇଛି ।

ଗୁରୁବାର ନୂଆଦିଲ୍ଲୀ ଠାରେ ଆୟୋଜିତ ଏକ କାର୍ଯ୍ୟକ୍ରମରେ କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତି ସ୍ମୃତି ଇରାନୀ ଏହି ସମ୍ମାନ ପ୍ରଦାନ କରିଛନ୍ତି । ସୋଆର ପ୍ରୋ-ଚାନ୍ସେଲର ପ୍ରଫେସର (ଡାକ୍ତର) ଅମିତ ବାନାର୍ଜୀ ଏବଂ ଅଫିସର ଅନ୍ ସ୍ପେଶାଲ ଡ୍ୟୁଟି ଶ୍ରୀ ପ୍ରୀତମ ନାୟକ ବିଶ୍ୱବିଦ୍ୟାଳୟ ପକ୍ଷରୁ ଏହି ସାର୍ଟିଫିକେଟ ଗ୍ରହଣ କରିଛନ୍ତି ।

‘ଓଡ଼ିଶାର ଏକ ମାତ୍ର ଶିକ୍ଷାନୁଷ୍ଠାନ ଭାବେ ଏହି ତାଲିକାରେ ସାମିଲ ହୋଇଛି ସୋଆ । ନ୍ୟାସ୍ନାଲ୍ ଇନ୍ଷ୍ଟିଚ୍ୟୁସ୍ନାଲ୍ ର୍ୟାଙ୍କିଙ୍ଗ୍ ଫ୍ରେମୱାର୍କ (ଏନ୍ଆଇଆର୍ଏଫ୍) ୨୦୨୧ରେ ବିଶ୍ୱବିଦ୍ୟାଳୟ କ୍ୟାଟେଗୋରୀରେ ୨୦ତମ ସ୍ଥାନରେ ରହିଛି ସୋଆ । ଏହି କାର୍ଯ୍ୟକ୍ରମରେ କ୍ୟୁଏସ୍ ଆଇ-ଗଜ୍ର ସିଇଓ ଏବଂ ନିର୍ଦ୍ଦେଶକ ଡକ୍ଟର ଅଶ୍ୱିନ ଫର୍ଣ୍ଣାଣ୍ଡିଜ୍ କହିଥିଲେ ଯେ ଶିକ୍ଷା କ୍ଷେତ୍ରରେ ଗୁଣାବତା ଏବଂ ଉକ୍ରର୍ଷତାର ଅନେକ ମହତ୍ୱ ରହିଛି ।

ଏହା ଶିକ୍ଷା ଗ୍ରହଣକାରୀର ଦକ୍ଷତା ଏବଂ ପାରଦର୍ଶିତାକୁ ବୃଦ୍ଧି କରିଥାଏ ଯାହା ଦ୍ୱାରା ବିକାଶଶୀଳ ଏବଂ ଅବିକଶିତ ଦେଶଗୁଡ଼ିକ ମଧ୍ୟରେ ଥିବା ପ୍ରଭେଦକୁ ଯୋଡି ଥାଏ । ଭାରତୀୟ ଶିକ୍ଷାନୁଷ୍ଠାନ ଗୁଡ଼ିକୁ ବିଶ୍ୱସ୍ତରୀୟ ଶିକ୍ଷା ବ୍ୟବସ୍ଥା ପ୍ରଦାନ କରିବାରେ କ୍ୟୁଏସ୍ ଆଇ-ଗଜ ପ୍ରମୁଖ ଭୂମିକା ତୁଲାଉଛି ବୋଲି ସେ କହିଥିଲେ ।