ଇରାନର ଖର୍ଗ ଦ୍ୱୀପ ଉପରେ ଆକ୍ରମଣ କରିପାରେ ଆମେରିକା: ଚେତାବନୀ ଦେଲେ ଟ୍ରମ୍ପ

 ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ନୂତନ ଚେତାବନୀ ଜାରି କରି କହିଛନ୍ତି ଯେ, ଆମେରିକା ଇରାନର ତୈଳ ସମୃଦ୍ଧ ଖର୍ଗ ଦ୍ୱୀପ ଉପରେ ଆକ୍ରମଣ କରିପାରେ। ସେ କହିଛନ୍ତି ଯେ ନିକଟରେ ହୋଇଥିବା ଆକ୍ରମଣରେ ଏହି ସୁବିଧା ବହୁଳ ଭାବରେ କ୍ଷତିଗ୍ରସ୍ତ ହୋଇସାରିଛି କିନ୍ତୁ ‘କେବଳ ମଜା ପାଇଁ’ ପୁନର୍ବାର ଟାର୍ଗେଟ୍ କରାଯାଇପାରେ। ଆମେରିକା, ଇସ୍ରାଏଲ୍ ଓ ଇରାନ ମଧ୍ୟରେ ଯୁଦ୍ଧ ଶନିବାର ତୃତୀୟ ସପ୍ତାହରେ ପ୍ରବେଶ କରିବା ପରେ ତାଙ୍କ ମନ୍ତବ୍ୟ ଆସିଛି, ଯାହା ବ୍ୟାପକ ଆଞ୍ଚଳିକ ଉତ୍ତେଜନା ବୃଦ୍ଧି ଓ ବିଶ୍ୱ ତୈଳ ଯୋଗାଣରେ ବ୍ୟାଘାତର ଆଶଙ୍କା ବଢାଇଛି।ଏନ୍‌ବିସି ନ୍ୟୁଜ୍ ସହିତ କଥାବାର୍ତ୍ତା କରି ଟ୍ରମ୍ପ୍ କହିଛନ୍ତି ଯେ, ନିକଟରେ ହୋଇଥିବା ଆମେରିକାର ବିମାନ ଆକ୍ରମଣ ଇରାନର ମୁଖ୍ୟ ତୈଳ ରପ୍ତାନି ଟର୍ମିନାଲ୍ ଖର୍ଗ ଦ୍ୱୀପର ଅଧିକାଂଶ ଭାଗକୁ କ୍ଷତିଗ୍ରସ୍ତ କରିଛି। ଯଦିଚ ତେହେରାନ ବିବାଦର ଅନ୍ତ ପାଇଁ ବୁଝାମଣା କରିବାକୁ ଇଚ୍ଛୁକ, ତଥାପି ପ୍ରସ୍ତାବିତ ସର୍ତ୍ତ ୱାସିଂଟନ ପାଇଁ ଗ୍ରହଣୀୟ ନୁହେଁ। ଇରାନର ଦକ୍ଷିଣ ଉପକୂଳଠାରୁ ପ୍ରାୟ ୩୦ କିଲୋମିଟର ଦୂରରେ ଅବସ୍ଥିତ ଖର୍ଗ ଦ୍ୱୀପ ଦେଶର ପ୍ରାୟ ୯୦% ଅଶୋଧିତ ତୈଳ ରପ୍ତାନି କରିଥାଏ। ଏହି ସୁବିଧା ରଣନୀତିକ ହର୍ମୁଜ୍ ପ୍ରଣାଳୀ ନିକଟରେ ଅବସ୍ଥିତ, ଯାହା ଦେଇ ବିଶ୍ୱର ତୈଳ ଯୋଗାଣର ପ୍ରାୟ ଏକ ପଞ୍ଚମାଂଶ ଯାଇଥାଏ। ସେଠାରେ କୌଣସି ସ୍ଥାୟୀ ବ୍ୟାଘାତ ବିଶ୍ୱ ଶକ୍ତି ମୂଲ୍ୟକୁ ତୀବ୍ର ଭାବରେ ବୃଦ୍ଧି କରିପାରେ ଏବଂ ଅନ୍ତର୍ଜାତୀୟ ଯୋଗାଣ ଶୃଙ୍ଖଳା ଉପରେ ଚାପ ପକାଇପାରେ।ଟ୍ରୁଥ୍ ସୋସିଆଲରେ ପୋଷ୍ଟ କରି ଟ୍ରମ୍ପ୍ ଲେଖିଛନ୍ତି- ମୋ ନିର୍ଦ୍ଦେଶରେ, ଆମେରିକାର ସେଣ୍ଟ୍ରାଲ୍ କମାଣ୍ଡ ମଧ୍ୟପ୍ରାଚ୍ୟ ଇତିହାସର ସବୁଠାରୁ ଶକ୍ତିଶାଳୀ ବୋମା ବିସ୍ଫୋରଣ କରିଥିଲା ଏବଂ ଇରାନର ମୁକୁଟମଣି ଖର୍ଗ ଦ୍ୱୀପରେ ଥିବା ସମସ୍ତ ସାମରିକ ଲକ୍ଷ୍ୟକୁ ସମ୍ପୂର୍ଣ୍ଣ ରୂପେ ଧ୍ୱଂସ କରିଦେଇଥିଲା। କିନ୍ତୁ ଦ୍ୱୀପର ତୈଳ ଭିତ୍ତିଭୂମି ଉପରେ ଆକ୍ରମଣ ନ କରି ୱାସିଂଟନ ସଂଯମ ଦେଖାଇଛି। ଯଦି ଇରାନ ହର୍ମୁଜ୍ ପ୍ରଣାଳୀରେ ସାମୁଦ୍ରିକ ଯାତାୟାତରେ ବାଧା ସୃଷ୍ଟି କରେ ତେବେ ଏହି ନିଷ୍ପତ୍ତି ବଦଳିପାରେ।