ଇତିହାସ ରଚିବେ ମୋଦି, ଭାଙ୍ଗିବେ ନେହେରୁଙ୍କ ରେକର୍ଡ

ଆସନ୍ତା ଜୁନ୍ ୧୦ ତାରିଖ ଭାରତୀୟ ରାଜନୀତି ଇତିହାସରେ ଯୋଡ଼ି ହେବ ଆଉ ଏକ ସ୍ୱର୍ଣ୍ଣିମ ଅଧ୍ୟାୟ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ଦୀର୍ଘଦିନର ରେକର୍ଡକୁ ପଛରେ ପକାଇବାକୁ ଯାଉଛନ୍ତି। ୨୦୧୪ ମେ’ ୨୬ରେ ପ୍ରଥମ ଥର ପ୍ରଧାନମନ୍ତ୍ରୀ ଭାବେ ଶପଥ ନେଇଥିବା ମୋଦି, ଜୁନ୍ ୧୦ ସୁଦ୍ଧା ଲଗାତାର ୪,୩୯୯ ଦିନ କ୍ଷମତାରେ ରହିବେ। ଏହା ସହ ସେ ନେହେରୁଙ୍କ ୪,୩୯୮ ଦିନର ନିରନ୍ତର ନିର୍ବାଚିତ ପ୍ରଧାନମନ୍ତ୍ରୀ ଭାବର ରେକର୍ଡକୁ ଅତିକ୍ରମ କରିବେ।

ସ୍ୱାଧୀନ ଭାରତରେ ନେହେରୁଙ୍କ ପରେ ଲଗାତାର ତିନିଥର ସାଧାରଣ ନିର୍ବାଚନ ଜିତି ପୂର୍ଣ୍ଣ କାର୍ଯ୍ୟକାଳ ପାଇଁ ପ୍ରଧାନମନ୍ତ୍ରୀ ହେବାରେ ମୋଦି ହେଉଛନ୍ତି ଦ୍ୱିତୀୟ ନେତା। ଏହାପୂର୍ବରୁ ସେ ଇନ୍ଦିରା ଗାନ୍ଧୀଙ୍କ ଦୀର୍ଘତମ ନିରନ୍ତର କାର୍ଯ୍ୟକାଳର ରେକର୍ଡକୁ ମଧ୍ୟ ଅତିକ୍ରମ କରିଥିଲେ। ୨୦୧୪, ୨୦୧୯ ଓ ୨୦୨୪ ଲୋକସଭା ନିର୍ବାଚନରେ କ୍ରମାଗତ ବିଜୟ ହାସଲ କରି ମୋଦି ନିଜ ନେତୃତ୍ୱକୁ ଆହୁରି ସୁଦୃଢ଼ କରିଛନ୍ତି। ରାଜନୈତିକ ବିଶ୍ଳେଷକଙ୍କ ମତରେ, ଭାରତ ଭଳି ବିବିଧତାପୂର୍ଣ୍ଣ ଗଣତନ୍ତ୍ରରେ ଲଗାତାର ତିନିଥର କ୍ଷମତା ବଜାୟ ରଖିବା ଏକ ବିରଳ ସଫଳତା।

ତେବେ ବିରୋଧୀ ଦଳଗୁଡ଼ିକ ବେକାରୀ, ମୁଦ୍ରାସ୍ଫୀତି ଓ ଗଣତାନ୍ତ୍ରିକ ସଂସ୍ଥାର କାର୍ଯ୍ୟକାରିତା ଭଳି ପ୍ରସଙ୍ଗ ଉଠାଇ ସରକାରଙ୍କୁ ସମାଲୋଚନା କରୁଛନ୍ତି। ଏସବୁ ମଧ୍ୟରେ ଜୁନ୍ ୧୦ରେ ନରେନ୍ଦ୍ର ମୋଦି ଭାରତର ସବୁଠାରୁ ଦୀର୍ଘ ସମୟ ଧରି ନିରନ୍ତର ନିର୍ବାଚିତ ପ୍ରଧାନମନ୍ତ୍ରୀ ଭାବେ ନୂଆ ଇତିହାସ ରଚିବାକୁ ଯାଉଛନ୍ତି। ଭାରତୀୟ ରାଜନୀତିରେ ଏହା ଏକ ସ୍ମରଣୀୟ ମାଇଲଖୁଣ୍ଟ ଭାବେ ଲିପିବଦ୍ଧ ହେବ।