ଦେଶ ଛାଡି ଚାଲିଯିବାର ଗୁଜବ ମଧ୍ୟରେ ସାଇରସ୍ ପୁନାୱାଲାଙ୍କ ବଡ଼ ବୟାନ୍
ନୂଆଦିଲ୍ଲୀ: ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ସିଇଓ ଆଦର ପୁନାୱାଲା ଦେଶ ଛାଡି ଚାଲିଯିବାର ଗୁଜବ ମଧ୍ୟରେ ପୁନାୱାଲା ଗ୍ରୁପ୍ର ଚେୟାରମ୍ୟାନ୍ ତଥା ତାଙ୍କ ପିତା ସାଇରସ୍ ପୁନାୱାଲା ମଧ୍ୟ ଲଣ୍ଡନରେ ପହଞ୍ଚିଛନ୍ତି। ତାଙ୍କ ପରିବାର ସେଠାରେ ପହଞ୍ଚିବା ପରେ ପୁନାୱାଲା ଦେଶ ଛାଡିବା ନେଇ କଳ୍ପନାଜଳ୍ପନା ତୀବ୍ର ହୋଇଛି। ତେବେ ସାଇରସ୍ ପୁନାୱାଲା ଏଭଳି ଗୁଜବକୁ ଭିତ୍ତିହୀନ ବୋଲି କହିଛନ୍ତି। ସେ ନିଶ୍ଚିତ ଭାବରେ ଗଣମାଧ୍ୟମକୁ କହିଛନ୍ତି ଯେ ସେ ୟୁରୋପରେ ଏକ ଟିକା ୟୁନିଟ୍ ପ୍ରତିଷ୍ଠା କରିବାକୁ ଚିନ୍ତା କରୁଛନ୍ତି।
ଏକ ଇଂରାଜୀ ଖବରକାଗଜକୁ ଦେଇଥିବା ଏକ ସାକ୍ଷାତକାରରେ ସାଇରସ୍ ପୁନାୱାଲା କହିଛନ୍ତି ଯେ ସେ ତାଙ୍କ ପରିବାର ସହିତ ଲଣ୍ଡନକୁ ପ୍ରତିବର୍ଷ ମେ’ରେ ଗ୍ରୀଷ୍ମ ଛୁଟି କଟାଇବାକୁ ଆସନ୍ତି। ତାଙ୍କ ପୁଅ ଏବଂ ସେ ଦେଶ ଛାଡି ପଳାୟନ କରୁଥିବା କଥାକୁ ସେ ସମ୍ପୂର୍ଣ୍ଣ ଭାବେ ପ୍ରତ୍ୟାଖ୍ୟାନ କରିଥିଲେ। ସାଇରସ୍ କହିଛନ୍ତି ଯେ ମେ ମାସରେ ଲଣ୍ଡନ ଆସିବା ଆମ ପାଇଁ ନୂଆ କଥା ନୁହେଁ, ଏହା ନିତିଦିନର ଏକ ଅଂଶ ଅଟେ।ସାଇରସ୍ ପୁନାୱାଲା ଏହା ମଧ୍ୟ କହିଛନ୍ତି ଯେ, ତାଙ୍କ କମ୍ପାନୀ ୟୁରୋପରେ ଏକ ନୂତନ ଟିକା ୟୁନିଟ୍ ପ୍ରବର୍ତ୍ତନ କରିବାକୁ ଯୋଜନା କରୁଛି। ୟୁକ୍ରେନ କିମ୍ବା ବ୍ରିଟେନରେ ଏକ ଉତ୍ପାଦନ ୟୁନିଟ୍ ଖୋଲିବାକୁ ସେରମ୍ ପ୍ରତିଷ୍ଠାନ ଏଠାରେ ସରକାରଙ୍କ ସହ ଆଲୋଚନା କରୁଛି। ତେବେ ଇତି ମଧ୍ୟରେ ଭାରତରେ ଟିକା ଉତ୍ପାଦନ ଜାରି ରହିବ ବୋଲି ସେ କହିଛନ୍ତି।
ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆ ଭାରତରେ କରୋନା ଟିକା (କୋଭିଶିଲ୍ଡ) ପ୍ରସ୍ତୁତ କରୁଛି ।ସୂଚନା ଅନୁଯାୟୀ, ଏହିଠାରେ ଅଧିକାଂଶ ଟିକା ତିଆରି ହୋଇଥାଏ, କିନ୍ତୁ କିଛି ସମୟ ଧରି ଭାରତରେ ଟିକା ଅଭାବ ଦେଖାଦେଇଥିଲା। ଗତ ମାସରେ କମ୍ପାନୀର ସିଇଓ ଆଦର ପୁନାୱାଲା ତାଙ୍କ ପରିବାର ସହିତ ଲଣ୍ଡନରେ ପହଞ୍ଚିଥିଲେ। ଏହି ସମୟରେ ସେ କିଛି ଗଣମାଧ୍ୟମକୁ ଦେଇଥିବା ଏକ ସାକ୍ଷାତକାରରେ କହିଥିଲେ ଯେ ଭାରତରେ ତୁରନ୍ତ ଟିକା ଯୋଗାଣ ସମ୍ପର୍କରେ ତାଙ୍କ ନିକଟକୁ କିଛି ରାଜନୈତିକ ତଥା ଶକ୍ତିଶାଳୀ ବ୍ୟକ୍ତିଙ୍କଠାରୁ ଧମକପୂର୍ଣ୍ଣ କଲ ଆସୁଥିଲା।