ତାମିଲନାଡୁରେ ହିନ୍ଦୀ ଭାଷା ଶିକ୍ଷା ବିବାଦ, ଗୁରୁତ୍ୱପୂର୍ଣ୍ଣ ମତ ରଖିଲେ ସୁପ୍ରିମକୋର୍ଟ

ତାମିଲନାଡୁରେ ଜବାହର ନବୋଦୟ ବିଦ୍ୟାଳୟ ପ୍ରତିଷ୍ଠାକୁ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ଚାଲିଥିବା ବିବାଦର ଶୁଣାଣି କରି ସୁପ୍ରିମକୋର୍ଟ କହିଛନ୍ତି ଯେ, ଭାଷା ଶିକ୍ଷାକୁ ନେଇ ରାଜ୍ୟ ସରକାରଙ୍କ ଆଭିମୁଖ୍ୟରେ ପରିବର୍ତ୍ତନ ଆସିବା ଆବଶ୍ୟକ। ବିଚାରପତି ବି.ଭି. ନାଗରତ୍ନା ଏବଂ ବିଚାରପତି ଅଗଷ୍ଟିନ୍ ଜର୍ଜ ମସିହଙ୍କ ଖଣ୍ଡପୀଠ କହିଛନ୍ତି ଯେ, ଭାରତର ସଂଘୀୟ ବ୍ୟବସ୍ଥାରେ ରାଜ୍ୟଗୁଡ଼ିକ କେନ୍ଦ୍ର ସରକାରଙ୍କଠାରୁ ସମ୍ପୂର୍ଣ୍ଣ ଭାବେ ଅଲଗା ହୋଇ କାର୍ଯ୍ୟ କରିପାରିବେ ନାହିଁ।

ନବୋଦୟ ବିଦ୍ୟାଳୟରେ ହିନ୍ଦୀ ସମେତ ଅନ୍ୟ ଭାଷା ଶିକ୍ଷା ଦିଆଯାଉଥିବା ପ୍ରସଙ୍ଗକୁ ନେଇ ତାମିଲନାଡୁ ସରକାର ଦୀର୍ଘଦିନ ଧରି ଏହି ବିଦ୍ୟାଳୟ ପ୍ରତିଷ୍ଠାକୁ ବିରୋଧ କରିଆସୁଛନ୍ତି। ଏଥିପାଇଁ ଆବଶ୍ୟକ ଜମି ଯୋଗାଇ ଦେବାକୁ ମଧ୍ୟ ରାଜ୍ୟ ସରକାର ରାଜି ହୋଇନଥିବା ଅଭିଯୋଗ ରହିଛି। କେନ୍ଦ୍ର ଶିକ୍ଷା ମନ୍ତ୍ରଣାଳୟ ଅଧୀନ ନବୋଦୟ ବିଦ୍ୟାଳୟ ସମିତି ପକ୍ଷରୁ ଦେଶର ବିଭିନ୍ନ ଜିଲ୍ଲାରେ ଆବାସିକ ବିଦ୍ୟାଳୟ ସ୍ଥାପନ କରାଯାଉଛି। ତାମିଲନାଡୁରେ ମଧ୍ୟ ଏଭଳି ବିଦ୍ୟାଳୟ ସ୍ଥାପନ କରିବାକୁ କେନ୍ଦ୍ର ପକ୍ଷରୁ ପ୍ରସ୍ତାବ ରହିଛି।

ତେବେ ହିନ୍ଦୀ ଭାଷା ଶିକ୍ଷାକୁ ନେଇ ରାଜ୍ୟର ଆଭିମୁଖ୍ୟ ଏହି ବିବାଦର ମୁଖ୍ୟ କାରଣ ପାଲଟିଛି। ଏହି ମାମଲାରେ ସୁପ୍ରିମକୋର୍ଟ ତାମିଲନାଡୁ ସରକାରଙ୍କୁ ନବୋଦୟ ବିଦ୍ୟାଳୟ ପ୍ରତିଷ୍ଠା ପାଇଁ ଜମି ଚିହ୍ନଟ କରିବାକୁ ଆଉ ତିନି ମାସ ସମୟ ଦେଇଛନ୍ତି। ଏଥିସହ କେନ୍ଦ୍ର ସରକାରଙ୍କ ସହ ଆଲୋଚନା କରି ଏହି ବିବାଦର ସମାଧାନ କରିବାକୁ ମଧ୍ୟ ଖଣ୍ଡପୀଠ ପରାମର୍ଶ ଦେଇଛନ୍ତି। ଅର୍ଥାତ୍, ନବୋଦୟ ବିଦ୍ୟାଳୟ ପ୍ରତିଷ୍ଠା ଓ ଭାଷା ଶିକ୍ଷାକୁ ନେଇ ତାମିଲନାଡୁରେ ଚାଲିଥିବା ବିବାଦ ଏବେ ସୁପ୍ରିମକୋର୍ଟଙ୍କ ହସ୍ତକ୍ଷେପ ପରେ ନୂଆ ମୋଡ଼ ନେଇଛି।