ପଶ୍ଚିମବଙ୍ଗ ମନ୍ତ୍ରିମଣ୍ଡଳର ସମ୍ପ୍ରସାରଣ, ୩୫ ନୂଆ ମନ୍ତ୍ରୀ ନେଲେ ଶପଥ

ପଶ୍ଚିମବଙ୍ଗରେ ସୋମବାର ମନ୍ତ୍ରିମଣ୍ଡଳର ବ୍ୟାପକ ସମ୍ପ୍ରସାରଣ କରାଯାଇଛି। ରାଜଭବନରେ ଆୟୋଜିତ ଏକ ଶପଥଗ୍ରହଣ ଉତ୍ସବରେ ରାଜ୍ୟପାଳ ଆର.ଏନ୍. ରବି ନୂତନ ମନ୍ତ୍ରୀମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଏହି ପର୍ଯ୍ୟାୟରେ ମୋଟ ୩୫ ଜଣ ମନ୍ତ୍ରୀ ଶପଥ ନେଇଛନ୍ତି।

ଏହା ପୂର୍ବରୁ ମେ’ ୯ ତାରିଖରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ସହ ଦିଲୀପ ଘୋଷ, ଅଗ୍ନିମିତ୍ର ପାଉଲ, ଅଶୋକ କୀର୍ତ୍ତନିଆ, ନିସିଥ ପ୍ରାମାଣିକ ଓ କ୍ଷୁଦ୍ରରାମ ଟୁଡୁ କ୍ୟାବିନେଟ୍ ମନ୍ତ୍ରୀ ଭାବେ ଶପଥ ନେଇଥିଲେ। ବର୍ତ୍ତମାନ ନୂତନ ୩୫ ଜଣ ମନ୍ତ୍ରୀଙ୍କ ସମ୍ମିଳନ ସହ ରାଜ୍ୟରେ ମୋଟ ମନ୍ତ୍ରୀଙ୍କ ସଂଖ୍ୟା ୪୧ରେ ପହଞ୍ଚିଛି।

ନୂତନ ଭାବେ ଶପଥ ନେଇଥିବା ୩୫ ଜଣଙ୍କ ମଧ୍ୟରୁ ୧୩ ଜଣ କ୍ୟାବିନେଟ୍ ମନ୍ତ୍ରୀ, ୩ ଜଣ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଏବଂ ୧୯ ଜଣ ରାଷ୍ଟ୍ରମନ୍ତ୍ରୀ ଅଛନ୍ତି। ଏହି ତାଲିକାରେ ଦୀପକ ବର୍ମନ, ତାପସ ରାୟ, ଡା. ଶଙ୍କର ଘୋଷ, ମନୋଜ କୁମାର ଓରାଓଁ, ଅର୍ଜୁନ ସିଂହ, ଗୌରୀ ଶଙ୍କର ଘୋଷ, ସ୍ୱପନ ଦାସଗୁପ୍ତା, ଜଗନ୍ନାଥ ଚଟ୍ଟୋପାଧ୍ୟାୟ, କଲ୍ୟାଣ ଚକ୍ରବର୍ତ୍ତୀ, ଅଜୟ ପୋଦ୍ଦାର, ସାରଦୱତ ମୁଖାର୍ଜୀ, ଦୁଧ କୁମାର ମଣ୍ଡଳ ଓ ଅନୁପ କୁମାର ଦାସ ପ୍ରମୁଖ କ୍ୟାବିନେଟ୍ ମନ୍ତ୍ରୀ ଭାବେ ସ୍ଥାନ ପାଇଛନ୍ତି।

ସେହିପରି ଡା. ଇନ୍ଦ୍ରନୀଲ ଖାନ, ମାଳତୀ ରାଓ ରାୟ ଓ ରାଜେଶ ମହତୋଙ୍କୁ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଭାବେ ଶପଥ ଦିଆଯାଇଛି। ଅନ୍ୟମାନେ ରାଷ୍ଟ୍ରମନ୍ତ୍ରୀ ଭାବେ ମନ୍ତ୍ରିମଣ୍ଡଳରେ ସାମିଲ ହୋଇଛନ୍ତି।

ପଶ୍ଚିମବଙ୍ଗ ବିଧାନସଭାର ଆକାର ଅନୁଯାୟୀ, ମୁଖ୍ୟମନ୍ତ୍ରୀଙ୍କୁ ଛାଡ଼ି ରାଜ୍ୟରେ ସର୍ବାଧିକ ୪୪ ଜଣ ମନ୍ତ୍ରୀ ନିଯୁକ୍ତ ହୋଇପାରିବେ। ବର୍ତ୍ତମାନ ମୁଖ୍ୟମନ୍ତ୍ରୀଙ୍କ ସମେତ ମୋଟ ମନ୍ତ୍ରୀଙ୍କ ସଂଖ୍ୟା ୪୧ ହୋଇଥିବାରୁ ଆହୁରି ୩ଟି ପଦ ଖାଲି ରହିଛି।